Nis sezoni ngrohës në Prishtinë, Rama: “Termokosi” i mbulon mbi 33 mijë njësi banesore
Sot ka nisur zyrtarisht sezoni ngrohës 2024/2025 në Prishtinë. Kryetari i Prishtinës, Përparim Rama së bashku me Kryeshefin Ekzekutiv të Termokos-it, Fisnik Osmani, Aksionarët dhe Bordin e Drejtorëve të ndërmarrjes kanë zhvilluat takim në këtë ndërmarrje.
Rama ka uruar një sezon të mbarë dhe të suksesshëm, duke falënderuar ekipin për punën e tyre të mrekullueshme.
“Nëpërmjet shërbimit të Termokos-it, po ndërtojmë një kryeqytet më të pastër dhe më miqësor për mjedisin. Ky rrjet ngrohjeje mbulon mbi 33 mijë njësi banesore, me rreth 25 mijë konsumatorë aktivë, që përfaqësojnë më shumë se 130 mijë banorë”, ka shkruar Rama në rrjetin social Facebook.
Sipas tij janë rreth 1 mijë objekte banesore të kyçura në rrjet, me një sipërfaqe totale prej rreth 2.800.000 m², nga të cilat rreth 2.200.000 m² janë aktualisht aktive.
