Rrahmani: Bashkë me Korenicën konkluduam se duhet të fillojmë diçka të re

Deputeti Eman Rrahmani, i cili këto ditë ka deklaruar largimin e tij nga Lëvizja Vetëvendosje i ftuar në “Lajmet e fundit” në RTK, ka thënë se me caktimin e datës së zgjedhjeve i ka ardhur fundi edhe mandatit të deputetit.

“Konsideroj që ka përfundua edhe mandati i deputetit si anëtar i një subjekti politik. Jam i bindur se kam mbajtur edhe qëndrimet që i kam deklaruar qysh kur veç kanë filluar mospajtimet për çështje të caktuara që tashmë dihen edhe publikisht dhe të cilat i kemi kundërshtuar gjatë kësaj kohe”, ka thënë ai.

Sipas tij, Kodi Civil me përmbajtjen dhe dy paragrafet e një neni të cilët i ka kundërshtuar ka qenë fillimi mosdakordimit edhe një lloj reflektimi se a duhet të vazhdojnë më tutje me Vetëvendosjen.

“Kemi pasur kryesisht debate të ndryshme në grupin parlamentar dhe me kryeministrin, kryeparlamentarin dhe me shefen e Grupit Parlamentar që nuk jemi dakorduar që në atë mënyrë të procedohet. Kanë vendosur të procedojnë Kodin Civil me atë përmbajtje e cila është e papranueshme për shoqërinë kosovare dhe fatmirësisht është votuar me shumicën e votave kundër. Është e vetmja iniciativë ligjore që ka marrë shumicë votash kundër dhe i është kthyer mbrapsht qeverisë. Mbas saj ka pasur shkarkime prej pozitave menaxhuese në LVV, siç ka qenë shkarkimi i Visar Korenices prej koordinatorit të qendrës së Rahovecit”, ka thënë ai.

Sipas tij, mospajtime kanë pasur edhe për ligjin për fertilizim të cilin e kanë kundërshtuar.

“Kemi propozuar amendamente se sit ë rregullohet të trajtohet në mënyrën e duhur. Por së fundmi ka ardhur edhe një ligj që është shumë më i dëmshëm, që është ligji për gjendjen civile në të cilin parashihet që t’ju lejohet ndryshimi i gjinisë varësisht prej ndjesisë së personit dhe atë edhe nënë moshën 18 vjeçare”, ka thënë ai

Rrahmani ka thënë se pas gjithë këtyre ngjarjeve ai, bashkë me deputetin Korenica kanë ardhur në konkludim që duhet të fillojnë diçka të re. “Diçka që synim ka për të pasur ruajtjen e familjes tradicionale, familje ku ka nënë, baba, djalë dhe vajzë”, ka theksuar Rrahmani.

Megjithëkëtë, ai ka theksuar se do të vazhdoi  të votoi çdo ligj që është në dobi të qytetarëve pa marrë parasysh se prej ku dhe si vjen. /rtk