Ademi: Diplomacia jonë ka dështuar t’i bindë ndërkombëtarët për rastin “Banjska”

Profesori i kriminalistikës, Mensut Ademi, thotë se diplomacia kosovare ka dështuar t’i bindë faktorët ndërkombëtarë se çfarë ka ndodhur një vit më parë në Banjskë të Zveçanit.

Ademi thotë se kryeministri Albin Kurti është dashur që të shkojë dhe të raportojë në çdo shtet për agresionin që është bërë, pavarësisht që asnjë shtet nuk i ka bërë thirrje.

“Në këtë rast, diplomacia e Kosovës ka dështuar. Diplomacia jonë ka dështuar me i bindë faktorët ndërkombëtarë se çfarë ka ndodhur në Republikën e Kosovës. Një nga një është dashur me i bind. Ky është dështimi. E para, askush nuk na e ka pritur kryeministrin tonë… Është dashur t’i hip aeroplanit me shku shtet më shtet me tregu se çka ka ndodh… Edhe Kuvendi i Kosovës është dashur t’i raportojë secilit kuvend, të Maqedonisë, Bosnjës, Kroacisë, Shqipërisë, Rumanisë, Bullgarisë. Me u ulë e me i dërgu letër”, tha ai në Tëvë1.

Profesori i kriminalistikës tha se Qeveria e Kosovës, çdo sektor sigurie dhe njerëzit profesionistë duhen të bashkohen për t’i nxjerrë në pah faktet.

“Gabimin më të madh që ne e bëjmë në Republikën e Kosovës, sidomos ne që thirremi si profesionistë – nuk akuzohet Qeveria, nuk akuzohen njerëzit profesionistë, por duhet të bashkohen bashkë, secili në fushën e vetë”, shtoi ai.

Një vit më parë në fshatin Banjskë të Zveçanit, një grup i armatosur i prirë nga ish-politikani Millan Radoiçiq, sulmoi Policinë e Kosovës.

Radoiçiqi pranoi organizimin dhe pjesëmarrjen në sulm. Ai u hetua në Beograd dhe në Prishtinë ku ndaj tij dhe 44 personave tjerë u ngrit aktakuzë për veprimtari terroriste.

Derisa ai besohet se po qëndron në Serbi, një vit pas në fshatin tashmë të qetë të Banjskës banorët vazhdojnë jetojnë me misterin e sulmit të 24 shtatorit të vitit të kaluar.