Ministri i Drejtësisë së Maltës mbështet Kosovën në përmirësimin e kuadrit ligjor dhe efikasitetit gjyqësor

Gjatë një vizite zyrtare në Kosovë, Ministri i Maltës për Drejtësi dhe Reformë në Sektorin e Ndërtimit, Jonathan Attard, ka marrë pjesë në një sërë takimesh bilaterale të nivelit të lartë, të fokusuara në përmirësimin e sektorit të drejtësisë.

Ministrin e shoqëronte ambasadorja malteze në Kosovë, Juliana Scerri Ferrante dhe Konsulli i Nderit i Maltës në Kosovë, Remzi Ejupi.

Në një komunikatë për media nga Ministria e Drejtësisë së Maltës, në lidhje me vizitën e Attardit në vednin tonë, thuhet se diskutimet e tij u përqendruan rreth temave kryesore që synojnë përmirësimin e kuadrit ligjor dhe efikasitetit gjyqësor.

Aty thuhet se në një takim produktiv me homologen kosovare, Albulena Haxhiu, ministri Jonathan Attard ndau njohuri mbi reformat gjithëpërfshirëse të zbatuara nga qeveria malteze.

“Këto reforma janë krijuar për të forcuar sundimin e ligjit dhe për të përmirësuar proceset gjyqësore. Ministri theksoi guximin e treguar nga qeveria malteze në miratimin e ndryshimeve të rëndësishme, duke përfshirë rishikimin e procedurave të emërimit për gjyqësorin dhe rolet kushtetuese, si presidenti. Ai gjithashtu theksoi iniciativat strategjike të vazhdueshme që synojnë rritjen e specializimit brenda gjykatave malteze, veçanërisht në të drejtën tregtare, penale dhe familjare”, thotë komunikata për media.

Agjenda e ministrit përfshinte takime me përfaqësues nga Akademia e Drejtësisë, Komisioni për Legjislacion dhe Këshilli Gjyqësor i Kosovës.

Këto diskutime u fokusuan në praktikat më të mira të miratuara nga të dy vendet për të siguruar një proces të fuqishëm legjislativ dhe për të përmirësuar sektorin e drejtësisë.

Ai vlerësoi Akademinë e Drejtësisë për rolin e saj jetik në pajisjen e gjyqtarëve dhe prokurorëve me njohuritë dhe aftësitë më të fundit ligjore, duke përforcuar rëndësinë e zhvillimit të vazhdueshëm profesional në gjyqësor.

Gjatë gjithë vizitës së tij, ministri Jonathan Attard përsëriti përkushtimin e Maltës për të nxitur një marrëdhënie të fortë bashkëpunimi me Kosovën, duke pohuar se partneritete të tilla janë thelbësore për të dy kombet për të arritur një sistem gjyqësor më efikas dhe efektiv.

Vizita e tij në Kosovë erdhi në përvjetorin e 60-të të pavarësisë së Maltës, e cila u festua edhe në Prishtinë në një ceremoni të organizuar nga ambasadorja Scerri Ferrante dhe Konsulli i Nderit Ejupi, në këtë mbrëmje ku morën pjesë personalitete të shumta, duke përfshirë ministra e deputetë nga Kosova, ambasadorë dhe kryetari i Komunës së Prishtinës,mbrëmja shfaqi kulturën malteze, duke shfaqur zakonet dhe praktikat tradicionale, duke nënvizuar lidhjet e forta dhe respektin e ndërsjellë ndërmjet Maltës dhe Kosovës./Zëri