“Liria më e shtrenjtë se jeta”, Memli Krasniqi kujton Fehmi e Xhevë Lladrovcin

Kryetari i Partisë Demokratike të Kosovës, Memli Krasniqi, në një postim përkujtoi sot 26-vjetorin e rënies heroike të Fehmi dhe Xhevë Lladrovcit, së bashku me bashkëluftëtarët e tyre Fatime Hetemi, Behxhet Karaxha, Milazim Karaxha, Hamit Lladrovci dhe Shefqet Zeka.

Krasniqi tha se “Fehmiu dhe Xheva ishin gjithmonë bashkë. Të dy kishin lidhur fatin e tyre personal me fatin e Kosovës”.

Ai theksoi se për heronjtë e rënë “më e shtrenjtë ishte liria sesa jeta”, duke shtuar se ata “do të vdisnin me një buzëqeshje në fytyrë – sepse e dinin se kjo ishte rruga e vetme drejt nderit dhe përjetësisë”.

Krasniqi shprehu gjithashtu mirënjohjen e tij për të gjithë ata që kontribuan në luftën për liri, duke thënë se: “me sakrificë e vetëmohim, u bënë themel i horizontit të lirisë dhe shtetit tonë sovran”.

Në fund, ai e përmbylli mesazhin me fjalën: “Lavdi!”.