Osmani kujton Xhevë dhe Fehmi Lladrovcin: Janë gardianët e përjetshëm të lirisë dhe Republikës së Kosovës

Presidentja e vendit, Vjosa Osmani ka kujtuar Xhevë dhe Fehmi Lladrovcin në 26-vjetorin e rënies, duke thënë se ata janë gardianët e përjetshëm të lirisë dhe Republikës së Kosovës.

Osmani ka pohuar se ata kanë sakrifikuar gjithçka për lirinë që kemi sot.

“Sot shënojmë 26-vjetorin e rënies heroike të dy gjigantëve të historisë së kombit tonë, të cilët sakrifikuan gjithçka për lirinë që kemi sot. Ata ranë së bashku pikërisht në këtë ditë, të bashkuar edhe në përkushtimin e palëkundur për çlirimin e Kosovës. Xheva dhe Fehmiu, ishin më shumë se luftëtarë – simbole të shpresës dhe forcës për të gjithë ata që ëndërruan dhe dëshiruan një Kosovë të lirë dhe të pavarur”, thotë ajo.

Presidentja tutja ka shtuar se “trashëgimia që kanë lënë pas Xheva dhe Fehmiu i tejkalon kohët”.

“Ata kurorëzuan veprimtarinë e tyre patriotike me aktin e heroizmi të rënies në krye të betejës. Në çdo cep të Kosovës ndihet sakrifica e tyre – në lirinë që jetojmë, në shtetin që kemi ndërtuar dhe në shpresën për një të ardhme më të ndritur”.