Çitaku Kurtit: Kosova më e madhe sesa egoja jote, mashtrimit po i vjen fundi

Sekretarja e përgjithshme e PDK-së, Vlora Çitaku, e ka kritikuar kryeministrin e vendit Albin Kurtin për qasje të gabuar ndaj aleatëve.

Çitaku tha se Serbia dje e nënshkroi marrëveshjen me Amerikën për investime strategjike në fushën e energjetikës, pas marrëveshjes me Gjermaninë për litiumin e pas asaj me Francën për avionët e avancuar ushtarakë, e sipas saj Kosova është e izoluar, e sanksionuar dhe e përjashtuar.

“Kur miqtë tanë, ata pa ndihmën e të cilëve nuk do të ishim as të lirë e as të pavarur, që të gjithë na thonë që jemi në rrugë të gabuar, është koha me e pa veten në pasqyrë”.

“Nuk na ka faj kërkush. Bideni i keq, Trumpi i keq, Mogerini e keqe, Borrelli i keq, Grenelli i keq, Lajçaku i keq, Merkeli e keqe, Scholzi i keq, Macroni i keq, Rama i keq. Krejt na kanë faj. A po Albin? Vetëm ti e ke mirë. Ti edhe kush? Kush janë aleatët e tu Albin? Se pa aleatë nuk mundet as Amerika”, shkroi Çitaku.

Tutje, ajo i tha Kurtit se Kosova është më e madhe dhe më e rëndësishme sesa egoja e tij, teksa shtoi se “mashtrimit tënd po i vjen fundi”.