Lajçaku përfundon takimet e ndara me Bislimin dhe Petkoviqin, s’dihet nëse do të ketë trepalësh

Kryenegocitorët nga Kosova dhe Serbia kanë zhvilluar takime të ndara me emisarin evropian për dialog, Miroslav Lajçak.

Është ky një nga tentimet e palës evropiane që të organizojë një rund dialogu në nivel të kryenegociatorëve, ndonëse akoma nuk ka konfirmim nëse do të vijë deri te takimi i përbashkët.

Një zyrtar evropian, i informuar lidhur me takimet në fjalë, ka thënë se është vështirë të parashihet nëse do të ketë takim të përbashkët dhe se gjithçka do të varet nga atmosfera që do të dominojë gjatë bisedave të ndara.

Besnik Bislimi, kryenegociatori i Kosovës, ka përfunduar tashmë takimin e ndarë me Lajçakun, i cili kishte filluar në orën 9:00 dhe ka zgjatur gati 2 orë. Një takim të ngjashëm më pas e ka zhvilluar edhe homologu i Bislimit nga Beogradi, Petar Petkoviq, kryenegociatori serb.

Një ditë më parë Peter Stano, zëdhënës i Bashkimit Evropian, kishte paralajmëruar se në rundin e radhës do të diskutohen mënyrat si të shkohet tutje me zbatimin e marrëveshjes së arritur në Ohër në mars të vitit 2023, si dhe të gjitha çështjet e tjera të cilat sipas Stanos po ndikojnë në normalizimin ndërmjet Kosovës dhe Serbisë.

Paqartësitë lidhur me mbajtjen e takimit të përbashkët nisën qysh të premten që shkoi, kur kryenegociatori kosovar Besnik Bislimi, nëpërmjet rrjeteve sociale, konfirmoi gatishmërinë e palës kosovare për mbajtjen e takimit trepalësh, por se Serbia e ka refuzuar agjendën e ndërmjetësit.

Se kishte keqkuptime rreth agjendës e kanë konfirmuar disa burime në Bashkimin Evropian. Por këta zyrtarë shpjeguan se të dyja palët janë përgjegjëse për dështimin eventual të mbajtjes së takimit trepalësh. Gjithnjë sipas këtyre burimeve, të dyja palët u përpoqën të diktojnë agjendën e takimit trepalësh dhe nuk u dakorduan me kërkesat e ndërsjella, teksa kanë injoruar propozimin origjinal të palës evropiane. /RTK