ZPS-ja për dëshmitarin e 85-të: Ishte anëtar i UÇK-së
Në Dhomat e Specializuara të Kosovës (DHSK) në Hagë ka filluar dëshminë dëshmitari i 85-të i Zyrës së Prokurorit të Specializuar (ZPS), me kodin W04737, në procesin gjyqësor ndaj Hashim Thaçit, Kadri Veselit, Rexhep Selimit dhe Jakup Krasniqit.
Ky dëshmitar është duke dëshmuar me masa mbrojtëse dhe sipas përmbledhjes së lexuar nga përfaqësuesi i ZPS-së, Matt Halling, ai ishte anëtar i UÇK-së.
“Dëshmitari 04737 është një ish-anëtar i UÇK-së nga Zona Operative e Pashtrikut. Ai do të japë dëshmi lidhur me veprimtaritë gjatë luftës dhe strukturës së komandës në këtë brigadë”, tha Hallingu, raporton “Betimi për Drejtësi”.
Pas kësaj, pyetjet për dëshmitarin i ka filluar në seancë private prokurori Halling dhe sipas kryetarit të trupit gjykues, pyetjet e tij pritet të zgjasin rreth dy-tri orë.
Kryegjyqtari tha se për ekipet e mbrojtjes së të akuzuarve janë paraparë rreth gjashtë orë e gjysmë për kundërpyetjet e tyre.
Gjithashtu sallën e gjyqit u përmend që ky dëshmitar pritet që të dëshmojë një ose deri në dy ditë.
Ndryshe, përpara se të fillojë dëshminë ky dëshmitar, seanca kaloi në sesion privat për publikun.
Vlen të theksohet se të gjithë të akuzuarit janë prezent në sallën e gjyqit përveç Hashim Thaçit, i cili ishte i pranishëm përmes videolidhjes dhe se seanca e sotme ka filluar me vonesë.
Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /BetimipërDrejtësi
