Molliqaj: Problemi i veriut politik, po mbesin pa partneritet dhe pa sovranitet
Kryetari i Partisë Socialdemokrate (PSD), Dardan Molliqaj, ka thënë për Ekonominë Online se problemi në veri të vendit është problem politik e assesi rend dhe ligj.
Në një intervistë për Ekonominë Online, kreu i PSD-së ka thënë se në atë pjesë të Kosovës nuk ka sovranitet dhe as integrim të serbëve. Sovranitetin, sipas tij, tashmë e ka KFOR-i, që u vërtetua sipas tij me moshapjen e urës së Ibrit.
“Për PSD-në ka qenë gjithmonë e qartë, tash e gati dy vjet e gjysmë kur kanë fillu aksionet e para në veri të gjitha një nga një i kemi kundërshtuar për shkak se kemi besuar dhe me të drejtë ka dal ashtu që problemi i veriut është një problem politik, nuk është problem i rendit dhe ligjit. Sigurisht që rendi dhe ligji ka qenë pjesë e problemit, por problemi është politik. Si rezultat i veprimeve të njëpasnjëshme të Qeverisë së Kosovës në veri, atje kemi kontroll të shtetit të Kosovës, por nuk kemi integrim. Përkundrazi në pikën më të largët ndonjëherë serbët e Kosovës janë afër institucioneve të Kosovës. S’kemi kryetar të komunave, s’kemi gjyqtarë, s’kemi policë, s’kemi shërbim shëndetësor as asgjë, i cili është i integruar në sistemin e Kosovës. Përkundrazi të gjithë ata që kanë qenë sot nuk janë”.
“Nuk kemi sovranitet në veriun e Kosovës. Kushdo që thotë kështu është duke e mashtru opinionin publik. Sovranitetin në Veriun e Kosovës tashmë e ka KFOR-i dhe kjo është vërtetuar me mos hapjen e Urës, përkatësisht moslejimin e hapjes së Urës nga KFOR-i. Pra, një përgjegjësi e cila nuk do duhej të ishte e KFOR-it, sepse KFOR-i është reaguesi i tretë i sigurisë, e ka ndalu fizikisht Policinë e Kosovës për ta hapur atje, duke treguar që për Bashkësinë Ndërkombëtare Veriu i Kosovës do tretman tjetër politik. Dhe krejt kjo, pra, kontrolli, sovraniteti dhe autonomia është pjesa e tretë”, ka thënë Molliqaj.
Molliqaj ka komentuar situatën në veri të Kosovës, duke thënë se jemi drejt izolimit, pa sovranitet dhe partneritet. Sipas tij, këtë e ka prishur kryeministri Albin Kurti.
“Sovranitetin e ka marrë KFOR-i, ndërsa partneritetin e ka prishur Kurti. Mos harroni, ne e kemi Qeverinë e Kosovës që është e sanksionuar, përkatësisht nga Bashkimi Evropian dhe Shtetet e Bashkuara të Amerikës. Në anën tjetër, e kemi deklarimin e fundit të ambasadorit dhe Ambasadës Amerikane që i ndërpret bashkëpunimet me Ministrinë e Punëve të Brendshme dhe Policinë e Kosovës dhe vartësit e saj. Përkatësisht një institucion i cili është ndihmuar fuqishëm në ndërtimin e saj nga Perëndimi, në veçanti nga SHBA-ja, është quajtur i instrumentalizuar. PSD-ja ka qenë e para, jo për të marrë merita, por për të paralajmëruar që dërgimi i Policisë së Kosovës në veri dhe nganjëherë instrumentalizimi ekskluzivisht ndaj PSD-së, siç ishte rasti i arrestimit tim te televizioni T7, që pastaj me vendim të gjykate u tregu që ishte paligjshëm arrestimi”, u shpreh Molliqaj, teksa kritika ka edhe për “instrumentalizim” të Policisë së Kosovës nga pushteti. Këtë sipas tij e thonë edhe Shtetet e Bashkuara të Amerikës.
“Sot Shtetet e Bashkuara të Amerikës thonë se Policia e Kosovës është e instrumentalizuar nga pushteti. Vetëm pushtetet jodemokratike instrumentalizojnë institucionet e sigurisë dhe të tjera. Pra, nuk është qëndrim yni, nuk është qëndrim yti, nuk është qëndrim i kritikëve, as i Serbisë, është qëndrim i Shteteve të Bashkuara të Amerikës. Ka ardhë puna që nuk bashkëpunojnë, ndoshta një ditë do të jenë në lista të zeza”, deklaroi Molliqaj.
