Hovenier: SHBA-ja, e shqetësuar me disa zgjidhje politike që bëri qeveria “Kurti”

Ambasadori i Shteteve të Bashkuara të Amerikës në Kosovë, Jeffrey Hovenier, gjatë një vizite në Gjakovë rikonfirmoi mbështetjen amerikane për vendin tonë.

Megjithatë, ai para mediave tha se SHBA-ja, por edhe partnerët e tjerë kanë shqetësime lidhur me disa zgjidhje politike që i ka bërë qeveria “Kurti”.

“Sa u përket marrëdhënieve mes Kosovës dhe SHBA-së, nganjëherë ndiej se të gjithë doni të jeni psikiatër dhe të diagnostikoni ndonjë sëmundje mendore. Ka shumë njerëz të cilët kalojnë shumë kohë duke u brengosur për këtë çështje, do ta them atë që e them gjithmonë. Përkushtimi i SHBA-së ndaj popullit të Kosovës është i fuqishëm dhe i hekurt gjithmonë. Kemi qenë me popullin e Kosovës, jemi me ta dhe do të jemi. Kjo nuk nënkupton që duhet të pajtohemi me çdo zgjidhje të bërë nga çdo Qeveri e Kosovës. Nuk është e fshehtë se qeveria ime bashkë me disa prej partnerëve që punojmë Mbretëria e Bashkuar, Franca, Gjermania, Italia e BE-ja kemi disa shqetësime për disa zgjidhje politike që i ka bërë qeveria ‘Kurti’”, u shpreh ai para mediave.

Në konferencë për media, Hovenieri deklaroi se pas miratimit të Ligjit për KPK-në dhe KPM-në ka biseduar me zyrtarët e Qeverisë.

Ai potencoi se Qeveria duhet të sigurohet që legjislacionet të jenë në përputhje me normat evropiane, raporton telegrafi.

“Kam pasur rastin që të bisedojë me zyrtarët e qeverisë lidhur me këtë çështje. Dua të them se e kuptoj që ka shqetësime se a janë ligjet në përputhje me standardet evropiane apo jo. Këshilla e qeverisë amerikane për qeverinë e Kosovës gjithmonë është e njëjta që të sigurohen që ligjet që miratohen në Kuvend të jenë në përputhje me normat evropiane sepse ne shohim që Kosova duhet të jetë një ditë pjesë e BE-së”, tha Hovenieri.