Qeveria pas miratimit të ligjit për KPM-në: Sjell barazi dhe konkurrencë të shëndoshë në treg

Pas miratimit të ligjit për Komisionin e Pavarur të Mediave, Qeveria e Kosovës ka reaguar duke thënë se ky ligj sjell barazi dhe konkurrencë të shëndoshë në treg.

Edhe pse ky ligj u kritikua dhe pati reagime të shumta ndaj tij, duke u cilësuar si i tillë që cenon demokracinë e medias, qeveria ka thënë se ka ruajtur pavarësinë e mediave nga ndikimi politik dhe çdo ndikim tjetër që mund të perceptohej si i tillë nga publiku.

“Deputetët e Kuvendit të Republikës së Kosovës sot miratuan Ligjin për Komisionin e Pavarur të Mediave, të sponsorizuar nga Zyra e Kryeministrit, e të kërkuar vite me radhë nga Bashkimi Evropian, përmes Raportit për Vendin.  Ky Ligj në radhë të parë sjell barazi dhe konkurrencë të shëndoshë në treg. Kjo, sepse ky Ligj në plotëni përcjell direktivën për Shërbimet e Mediave Audiovizuele (AVMS) të Bashkimit Evropian, hartuar nga ekspertët e Bashkimit Evropian”.

“Gjatë konsultimeve e dëgjimeve publike të organizuara nga Zyra e Kryeministrit, u dëgjuan shumë palë, ekspertë të fushës, pjesëtarë të medias e shoqërisë civile. Të njëjtit u takuan edhe me ekspertët që kanë hartuar Ligjin, po ashtu nën organizimin e Zyrës së Kryeministrit”, ka shkruar qeveria.

Në reagimin e saj, qeveria tutje tha se AGK-së i kanë ofruar edhe takim të ndarë me ekspertët pas komenteve të tyre, për t’u siguruar që shqetësimet e tyre, sipas qeverisë, adresohen nga ata më të kualifikuarit e fushës së medias brenda BE-së.

Qeveria ka thënë se ka miratuar Projektligjin për Komisionin e Pavarur të Mediave, bazuar mbi disa parime, përcjell Klankosova.tv.

“Respektimit të plotë të direktivës AVMS,harmonizimit të këtij Projektligji me legjislacionin në fuqi dhe sigurimit të zbatimit të të drejtave të garantuara e përgjegjësive të mveshura për të gjitha subjektet, nga një organ i pavarur kushtetutës, pra KPM”.

“Direktiva e Bashkimit Evropian AVMS, shtrihet mbi dy parime kryesore: të siguruarit që çdo medium që prodhon informacion i nënshtrohet rregullave të njëjta dhe, që çdo qytetar ka të drejtë të informohet mbi atë se kush ia plason lajmin përmes të cilit informohet, marrë parasysh që gjykimet tona edhe formohen mbi lajmin që na plasohet”, thuhet në reagim.

Tutje, në reagim thuhet se qytetarët do jenë të informuar në çdo koh,  mbi atë kush ua plason lajmin, përmes qasjes në platformën e KPM-së e cila sipas qeverisë, do tregojë saktë përfituesit fundorë të secilit medium.

“Në dritë të kësaj, çdo portal që prodhon lajm vetërregullohet por, çdo portal që prodhon e plason lajm përmes audio apo video mesazhi, i duhet nënshtruar rregullave të njëjta me ato që vlejnë për televizion, sepse të dy këto kanë audiencën e njëjtë dhe kanë qëllimin e njëjtë – informimin. Andaj, të dy këto, për të qenë konkurrente në treg, i nënshtrohen rregullimit nga i njëjti organ i pavarur, në këtë rast Komisioni i Pavarur për Media”.

“Kosova nuk ka mekanizma tjerë të pavarur, institucional, që do mund të kryenin këtë detyrë të KPM-së. E këto qëndrime, janë të harmonizuara me vendimet e Gjykatës Evropiane të Drejtësisë.  Kemi ruajtur pavarësinë e mediave nga ndikimi politik e çdo ndikim tjetër që mund të perceptohej si i tillë nga publiku. Së këndejmi, asnjë parti politike dhe asnjë bashkësi fetare nuk mund të ketë pronësi në media”.

“Së fundmi, gjobat e parapara e të kritikuara nga shoqëria civile, janë të këtilla sepse janë harmonizuar me Ligjin në fuqi për Kundërvajtjet. Është detyrë e jona të sigurojmë harmonizimin dhe zbatimin efikas të ligjeve tona kombëtare.  Të udhëhequr nga ekspertët e Bashkimit Evropian e me vullnet për të fuqizuar KPM-në si institucion të pavarur kushtetues, por mbi të gjitha për t’i ofruar qytetarit të Kosovës mundësinë të krijojë opinionin në mënyrë të pavarur, gjithnjë sipas udhëzimeve të Direktivës AVMS.  Falenderojmë deputetët e Kuvendit të Republikës së Kosovës për votimin e një ligji cilësor e reformues”, thuhet tutje në reagim.