Sarrazini takon mërgimtarët shqiptarë në Gjermani, flet për integrimin evropian të Ballkanit Perëndimor, përfshirë Kosovën

Pse po zgjat kaq shumë? Një pyetje me të cilën ballafaqohet shpesh Manuel Sarrazin, i dërguari special i qeverisë federale për vendet e Ballkanit Perëndimor.

Kjo i referohet anëtarësimit në BE të vendeve si Kosova, Shqipëria, Bosnjë dhe Hercegovina, Mali i Zi, Maqedonisë së Veriut dhe Serbisë.

“Premtimi ka 20 vjet që ekziston. Dhe pak ka ndodhur deri tani. Të jem i sinqertë, kemi ndjesinë se duam vetëm të presim”, thotë Muhamet Idrizi, kryetar i parë një organizate të intelektualëve gjermano-shqiptarë nga Hamburgu.

Sipas mediave gjermane, së bashku me një grup prej 30 përfaqësuesish të diasporës kosovare-shqiptare nga e gjithë Gjermania, ai është mysafir në Ministrinë e Jashtme për të shkëmbyer biseda me Sarrazin.

Në mesin e shqiptarëve që u takuan me Sarrazinin ishte edhe biznesmeni nga Lugina e Preshevës, Agim Qerimi, i cili prej më shumë se tri dekada jeton në Gjermani ku në pronësi të tij ka edhe kompaninë “GENT-tech”.

Dhe siç thuhet më tej, shumë nga të pranishmit ishin të shqetësuar për rajonin.

Në bisedë mori pjesë edhe Niels von Redecker, kreu i departamentit të Ballkanit Perëndimor në Ministrinë e Jashtme Federale.

Siç përshkruhet më tej, atmosfera në takim është e ngrohtë, por edhe “kërkuese”.

Idrizi tha se donin të shfrytëzonin rastin që të kuptonin marrëdhëniet e politikës aktuale të Gjermanisë dhe BE-së për Ballkanin Perëndimor.

Siç theksohet më tej, Sarrazin e njeh shumë mirë Ballkanin, ai vazhdimisht udhëton në rajon dhe është në kontakt të ngushtë me të gjithë krerët e qeverive në rajon.

Dhe statusi i tij i jep atij hapësirë të veçantë për veprim.

Manuel Sarrazin, i dërguari special i Qeverisë Federale për Ballkanin Perëndimor

“Unë mund të negocioj duke ndonjë presje në një marrëveshje, por gjithashtu mund të shkëmbej ide diplomatikisht në nivelin më të lartë”.

Ai e përshkruan detyrën e tij si “diplomaci hibride”, një rol mes politikës dhe diplomacisë.

“Unë mund të bëj tre vizita pasuese brenda një muaji nëse kjo ndihmon kauzën…”.

Për Sarrazin, vendet e Ballkanit Perëndimor bëjnë pjesë në BE, pavarësisht disa vështirësive.

“Mandati im është të ndihmoj në afrimin e rajonit me BE-në. Pjesë e kësaj është i ashtuquajturi Procesi i Berlinit, një iniciativë e nisur nga Gjermania në vitin 2014 me qëllimin kryesor të përmirësimit të bashkëpunimit ekonomik rajonal”.

“Ne duam t’u japim njerëzve mundësinë të përjetojnë disa nga avantazhet e BE-së në jetën e tyre të përditshme. Ndër të tjera, përmes krijimit të një tregu të përbashkët rajonal për mallra, shërbime, kapital dhe njerëz, i cili gradualisht do të afrohet me tregun e brendshëm evropian”, shpjegon Sarrazin.

Më pas ai ka shpjeguar se pse është kaq e rëndësishme që Ballkani Perëndimor të bëhet pjesë e BE-së.

Në këtë drejtim, Sarrazin është shumë i qartë.

“Është një rajon që është shumë i afërt me ne fizikisht dhe kulturalisht. Nuk mund të jetë qëllimi ynë që ai të vazhdojë të mbetet jashtë rendit evropian, për të mos përmendur rëndësinë e shtuar të një strategjie të përbashkët gjeopolitike në BE”.