Krasniqit iu largua kravata kuq e zi, Buja: Kjo çka po ndodh në Hagë është keq për gjykatën, jo për të
Në seancën e sotme në Dhomat e Specializuara në Hagë vazhdoi gjykimi ndaj ish krerëve të Ushtrisë Çlirimtare të Kosovës.
Ish-zëdhënësit të UÇK-së, Jakup Krasniqi, iu hoq kravata me simbole kombëtare para se të futej në sallën e gjyqit.
Ish-komandanti i UÇK-së, Ramë Buja, foli për torturat që Krasniqi i kishte përjetuar si i burgosur nga Serbia. Në burg, së bashku kishin qëndruar për 18 muaj.
“Përgjatë kohës kur kemi qëndru për nja 18 muaj në një dhomë burgu s’ke mujt me i dal përpara për mbrojtje të vendit, E tash kjo gjykatë që kinse është për drejtësi po shihet si është dhe mendoj se është shumë shqetësuese”, tha Buja në T7.
Ai tha se Krasniqi “i ka kaluar të gjitha sfidat”.
“Jakup Krasniqi është përballë burrash, të gjitha sfidat i ka kaluar si i ka taku, e tash çka po ndodh në Hagë është keq për ta, jo për Jakup Krasniqin”, tha Buja.
