Gjykata vendosi që Berisha të jetë kryetar i PD-së, flet për herë të parë Basha
Lulzim Basha ka reaguar për herë të parë me një qëndrim zyrtar pas vendimit të të gjykatës së Apelit, i cili ka vendosur përfundimisht në favor të Sali Berishës në lidhje me kontestin për logon e Partisë Demokratike.
I pranishëm para gazetarëve në prag të mbledhjes së kryesisë së PD, Basha u shpreh se ai do të respektojë vendimin e gjykatës dhe se gjithashtu do të mbahet i përkushtuar ndaj vlerave dhe idealeve themeluese të partisë.
“Nuk komentoj vendimet e gjykatave; ky është një standard që kam vendosur për veten, standard që unë dhe Partia Demokratike kemi zbatuar dhe do të vazhdojmë të përmbahemi edhe në lidhje me vendimin më të fundit të gjykatës,” u shpreh Basha në deklaratën për mediat. “Dua të siguroj mbështetësit dhe demokratët – dhe edhe qytetarët që janë të zhgënjyer nga ky vendim – të mos mërziten dhe të mos dëshpërohen. Lufta jonë nuk është për simbole si logon apo vulën, as për pozita. Ajo është për të mbrojtur vlerat me të cilat u themelua Partia Demokratike dhe për të përfaqësuar sakrificën e atyre që luftuan kundër regjimit komunist”.
Basha vijoi duke theksuar unitetin e PD në luftën për të ardhmen e Shqipërisë dhe premtimin për të punuar pa u lodhur në përmbushjen e synimeve të partisë.
“Ne do të vazhdojmë betejën tonë, me apo pa logon e partisë, dhe do të marrim vendime të mençura që janë në përputhje me dëshirën e mijëra demokratëve që duan të shohin largimin e kësaj qeverie aktuale dhe të hapin një të ardhme të ndritshme për Shqipërinë”, vazhdoi Basha.
“Hapat që do të ndërmarrim në këtë drejtim do t’i diskutojmë dhe vendosim së bashku me kolegët e kryesisë në mbledhjen e sotme.”
Komentet e Bashës vijnë në një kohë tejet kritike për Partinë Demokratike, e cila po përballet me ndarje të brendshme dhe një kohë tranzicioni.
Dueli për logon ka simbolizuar jo vetëm një betejë ligjore, por edhe përplasjen e vizioneve të ndryshme brenda partisë më të madhe në opozitë në Shqipëri.
