Haradinaj: Vitia do të përjetojë zhvillim ekonomik me Aleancën në qeveri

Kryetari i Aleancës për Ardhmërinë e Kosovës, Ramush Haradinaj, ka marrë pjesë në shënimin e 24-vjetorit të themelimit të Aleancës në Viti.

Haradinaj përmes një postimi në rrjetin social Facebook ka bërë të ditur se ka marrë pjesë në shënimin e 24-vjetorit të themelimit të Aleancës në Viti.

Haradinaj para strukturës së degës ka thënë se në programin e Aleancës, Vitia përfshihet në një valë investimesh që do ta bëjnë të jetueshme këtë komunë.

“Aleancën në Viti, në 24-vjetorin e themelimit të degës atje, e përgëzova për dinamikën që kanë krijuar me aktivitetet e tyre në dobi të qytetarëve. I njoftova vitiasit, se Aleanca është në përmbyllje të hartimit të programit qeverisës, ku përpos orientimeve kryesore programore, edhe ky rajon i harruar nga qeveria aktuale, do të përfshihet në një valë investimesh që do ta bëjnë Vitinë më të jetueshme për qytetarët. Urime Viti!”, ka shkruar ai.