Temperaturat sot deri në 33 gradë, apelohet për kujdes ndaj rrezeve të diellit

Instituti Hidrometeorologjik i Kosovës (IHMK) ka njoftuar se sot mbi vendin tonë do të mbajë mot me diell dhe me vranësira të shpërndara.

Temperaturat minimale do të lëvizin ndërmjet 11-17 gradë Celsius, ndërsa maksimalet e ditës parashihen të lëvizin ndërmjet 28-33 gradë Celsius.

Do të fryjë erë kryesisht nga jugperëndimi me shpejtësi 1-3m/s.

IHMK-ja tutje shton se kushtet biometeorologjike do të jenë të kufizuara për shkak të temperaturave të larta dhe indeksit UV të lartë.

“Rekomandohet që në intervalin kohor 10-16 mundësisht të mos ju ekspozohemi rrezeve direkte të diellit, sepse ky mot është i papërshtatshëm për një shtresë të popullatës me sëmundje kronike. Të bartim masa mbrojtëse, syze dielli, rroba me ngjyra të lehta, kapelë ose ombrellë”, thuhet në njoftim.