Prokuroria Speciale ngre aktakuzë në lidhje me zjarrvënien në objektin e Gjykatës së Kaçanikut

Prokuroria Speciale ka ngritur aktakuzë ndaj të dyshuarit E.R. për zjarr-vënien në Gjykatën e Kaçanikut më 13 mars të këtij viti.

Prokuroria Speciale ka njoftuar se ka ngritur një aktakuzë ndaj një personi me inicialet E.R., për shkak të veprës penale rrezikim të rendit kushtetues përmes shkatërrimit apo dëmtimi të instalimeve dhe pajisjeve publike.

Përveç E.R., Prokuroria i ka propozuar Gjykatës Themelore në Ferizaj – Departamentit për të Mitur, shqiptimin e dënimit me burgim ndaj të miturve T. B., M.R. dhe V.T..

Ndaj të akuzuarit E.R., seanca gjyqësore pritet të mbahet në Departamentin Special të Gjykatës së Prishtinës.

Prokuroria Themelore e Ferizajt kishte njoftuar më 15 mars se tre të miturit po dyshohen se ishin autorët e vënies së zjarrit në objektin e Gjykatës Themelore të Ferizajt, Dega në Kaçanik.

Ndërsa, pak më vonë, ishte arrestuar edhe i dyshuari i katërt, E.R.

Menjëherë në vendin e ngjarjes kishin dalë ekipet e zjarrfikësve, të cilët rreth orës 04:40 e kishin lokalizuar dhe shuar zjarrin.

Si pasojë e këtij incidenti, ishin dëmtuar dy zyre të kësaj gjykate.