Shënohet Dita e Dëshmorëve të Mitrovicës, nderohen të rënët për liri
Sot është shënuar 6 Qershori – Dita e Dëshmorëve të Ushtrisë Çlirimtare të Kosovës (UÇK) në Mitrovicë.
Për nder të kësaj dite në varrezat e dëshmorëve në lagjen “Shipol” u organizua një aktivitet nga Komuna e Mitrovicës, ku u nderuan të rënët për liri.
Në këtë aktivitet morën pjesë kryetari i Komunës së Mitrovicës Bedri Hamza, nënkryetari i Komunës Arian Tahiri, drejtorë të drejtorive të kësaj komune, gjeneral Rrahman Rama, përfaqësues të shoqatave të dala nga lufta, pjesëtarë të FSK-së, e shumë qytetarë dhe familjarë të dëshmorëve.
Kryetari i Komunës së Mitrovicës, Bedri Hamza, ka thënë se flijimi i dëshmorëve në luftën e fundit është traseja më e dhimbshme e vendit tonë.
“Mitrovica i ka dhënë shumë Kosovës në çdo etapë të ekzistencës së saj, por trimëria e flijimi i dëshmorëve në luftën e fundit është traseja më e dhimbshme e vendit tonë në rrugën e gjatë të përpjekjeve për të realizuar të drejtën për të jetuar në liri. Kjo liri që sot po e gëzojmë është dhurata më domethënëse e vetë ekzistencës sonë. Dhuratë kjo të cilët ata e paguan me çmimin më të shtrenjtë, me vetë jetën e tyre”, ka thënë Hamza.
Hamza ka thënë se askush dhe asgjë nuk mund t’i zëvendësojë këta heronj.
“Dëshmorët e Mitrovicës, martirët dhe civilët janë gur-themeli i vetë ekzistencës tone. Janë garancia e dhënë me detyrën më të shtrenjtë të flijimit që ne sot të jetojmë në liri, të pavarur, të punojmë dhe të zhvillohemi. Kosova e lirë dhe e pavarur është amaneti i tyre dhe ky amanet u jetësua me guximin dhe besimin që patën. Ky amanet është dhe do të jetë udhërrëfyes i të gjithë neve për atdhedashurinë dhe përkushtimin për një Kosovë të denjë. Sot dhe çdo ditë u përulemi veprës heroike të dëshmorëve të Mitrovicës”, ka thënë Hamza.
Ndërsa, përfaqësuesja e Shoqatave të dala nga lufta, Alije Tmava, ka thënë se 6 qershori është një ditë e dhimbjes.
“Kjo ditë e shënuar është ditë e dhimbjes sepse u ndamë nga më të dashurit, por dhe krenari sepse dëshmorët janë ata që themeluan shtetin e Kosovës. Ushtria Çlirimtare e Kosovës e prirë nga Adem Jashari, komandanti legjendar me bijtë dhe bijat më të mirë ndërtuan aspiratën shekullore për çlirimin e Kosovës”, ka thënë Tmava.
Ajo është shprehur se dëshmorët duhet të jenë mobilizim për përkushtim ndaj atdheut. “Idealet e dëshmorëve janë vizioni ynë kombëtar. Dëshmorët na dhanë nder, kjo për ne duhet të jetë mobilizim për punë, përkushtim ndaj kombit dhe atdheut, ka thënë tutje ajo.
Tmava po ashtu ka përshëndetur ish-krerët e UÇK-së që po gjykohen në Hagë, e që sipas saj kjo po ndodh padrejtësisht.
Derisa, drejtori për Kulturë, Rini dhe Sport në Mitrovicë, Fahri Jashari, në një prononcim për Telegrafin ka thënë se kanë filluar më herët me vendosjen e flamujve dhe banerave në pjesë të ndryshme të qytetit për t’ua rikujtuar qytetarëve këtë ditë.
Jashari ka thënë se ora e parë e mësimit në shkollat e Mitrovicës i është kushtuar Ditës së Dëshmorëve.
“Sot në të gjitha shkollat e Mitrovicës, ora e parë iu ka kushtuar kësaj dite, luftës çlirimtare “, ka thënë Jashari, duke shtuar se gjatë homazheve secilit dëshmor do t’iu vendoset nga një lule mbi varr”, ka thënë Jashari.
Derisa, Ramë Osmani nga fshati Vërmicë për Telegrafin ka treguar se në këtë ditë forcat serbe ia kanë vrarë kushëririn, Sali Sejdiun, i cili ishte 22 vjeçar dhe pjesëtar i Ushtrisë Çlirimtare të Kosovës (UÇK).
Osmani ishte prezent në vendngjarje ditën kur u vranë dëshmorët, madje ai tregon se cili ka rënë i pari në mbrojtje të atdheut.
“Sali Sejdiu ka rënë i pari, Shaban Xhemajli i dyti, i treti ka rënë Zeqir Rexhepi, i katërti ka rënë Safet Rexhepi”, ka treguar Osmani.
Sot në varrezat e dëshmorëve në lagjen “Shipol” të Mitrovicës kanë qenë të pranishëm edhe Policia e Kosovës për të ruajtur rendin dhe qetësinë.
Gjersa qytetarët janë shprehur se duhet të bëhen këso organizime më shpesh me qëllim që gjeneratat e reja të rikujtojnë sakrificat që janë bërë për ta fituar lirinë që gëzojmë sot.
