KFOR: U njoftuam vetëm pak para aksionit në veri, s’ishim të përfshirë

Misioni i KFOR-it në Kosovë ka reaguar pas aksionit të Policisë së Kosovës në veri gjatë ditës së djeshme, ku janë mbyllur selitë e bankave ilegale të Serbisë në Kosovë.

Në një deklaratë për media, KFOR-i ka thënë se janë njoftuar pak para fillimit të aksionit dhe se nuk kanë qenë të përfshirë në të, transmeton Zeri.info.

“KFOR-i është njoftuar pak para fillimit të operacioneve kundër degëve të bankës ‘Postanska Stedionica’, të vendosura në komunat veriore të Mitrovicës Veriore, Leposaviqit, Zveçanit dhe Zubin Potokut. Personeli i KFOR-it nuk ishte i përfshirë në ekzekutimin e këtyre operacioneve”, thuhet në deklaratën e KFOR-it.

KFOR-i tutje thotë se pret konsultime me kohë për çdo veprim të Policisë së Kosovës ose të Forcës së Sigurisë së Kosovës që mund të ndikojë në sigurinë rajonale.

“KFOR-i vazhdon të mbështesë dialogun Beograd - Prishtinë të lehtësuar nga BE-ja, duke ofruar kornizën e sigurisë të nevojshme që diplomacia të ecë përpara. Kjo është mënyra e vetme për të zgjidhur çështjet e pazgjidhura dhe për të arritur zgjidhje që respektojnë të drejtat e të gjitha komuniteteve”, thuhet në deklaratë.

Tutje si çdoherë, misioni ka ripërsëritur se KFOR-i vazhdon të zbatojë mandatin e tij - bazuar në Rezolutën 1244 të Këshillit të Sigurimit të OKB-së të vitit 1999 - për të ofruar një mjedis të sigurt dhe të sigurt për të gjitha komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme. KFOR-i është reaguesi i tretë i sigurisë, pas Policisë së Kosovës dhe misionit të BE-së për Sundimin e Ligjit (EULEX), përkatësisht, me të cilët punojmë në koordinim të ngushtë. /Zëri