Gërvalla pas dështimit në KiE: Disa shtete zgjodhën t’i japin mbështetje fushatës lobuese të Serbisë

Ministrja e Punëve të Jashtme, Donika Gërvalla, ka thënë se Këshilli i Ministrave i Këshillit të Evropës nuk e ka futur në agjendë anëtarësimin e Kosovës dhe as nuk mori vendim për thirrjen e një mbledhjeje të jashtëzakonshme në lidhje me këtë çështje.

Gërvalla tha se ky qëndrim është në mospërputhje me thirrjen e Asamblesë Parlamentare të Këshillit të Kosovës, e cila në opinionin e saj ka thënë se Kosova duhet të anëtarësohet pa parakushte shtesë.

“Duke qenë se vendit i ishte vendosur një parakusht i vonshëm, joformal e arbitrar, Qeveria e Republikës së Kosovës bëri një propozim dje (përmes një oferte të shënuar në një komunikim përmes letrës drejtuar KiE-së) të arsyeshëm për tejkalimin e bllokadës që kishte krijuar ky parakusht i fundit”.

“Edhe pse oferta jonë, e konsultuar me partnerë të shteteve anëtare, në këmbim të një vendimi pozitiv sot në Komitet të Ministrave ofroi një platformë të gjerë të punës së përbashkët, ajo ofertë nuk u mor parasysh. Rrjedhimisht ajo letër me ofertë e humbi vetvetiu aktualitetin dhe relevancën pas mbledhjes së sotshme të Komitetit të Ministrave”, shkroi Gërvalla, transmeton Klankosova.tv.

Tutje, Gërvalla tha se pavarësisht Opinionit të Asamblesë Parlamentare dhe një propozimi të arsyeshëm e serioz nga Qeveria e Kosovës, disa vende anëtarë të KiE-së i kanë dhënë mbështetje fushatës lobuese të Serbisë.

“Megjithatë, në vend të Opinionit të Asamblesë Parlamentare të Këshillit të Evropës dhe një propozimi të arsyeshëm e serioz nga Qeveria e Kosovës, disa vende anëtare zgjodhën t’i dalin në krah padrejtësive dhe t’i japin mbështetje fushatës lobuese të Serbisë kundër anëtarësimit të Kosovës, duke privuar kështu qytetarët e Republikës së Kosovës nga të drejtat dhe mundësitë që ofrojnë mekanizmat e kësaj organizate, veçanërisht për komunitetet e pakicës etnike dhe komunitetet e tjera të margjinalizuara”.

“Kosova i ka plotësuar të gjitha kriteret e kushtet për anëtarësim në Këshillin e Evropës (KiE). Nga opinioni i Departamentit Ligjor të Këshillit të Evropës që konfirmon se nuk ka asnjë pengesë ligjore për anëtarësim si shtet evropian, nga votimi i ambasadorëve më 24 prill 2023 me 33 vota për nga 46 sosh, nga raporti pozitiv i tre juristëve eminentë te raporti i raportueses Dora Bakoyannis, nga dy mbledhjet e Këshillit për Çështje Politike e Demokraci (në Paris me 27 mars dhe në Strasbourg më 16 prill 2024) e deri te votimi i Asamblesë Parlamentare më 16 prill 2024 me 131 vota për, kundrejt 29 kundër”, tha ajo, transmeton Klankosova.tv.

Më tej, ajo tha se anëtarësimi i Kosovës në Këshillin e Evropës nuk do të mund të ndalet, edhe nëse vonohet për “shkak të ndonjë kundërshtari të Kosovës apo lobimit të Serbisë”.

“Jemi në rrugë të drejtë dhe po bëjmë punë të mbarë. Nuk kemi lënë gur pa lëvizur, gjithnjë përbrenda kushtetutshmërisë e ligjshmërisë, për interesin e Kosovën”, tha ajo.