Osmani në 25-vjetorin e rënies së Agim Ramadanit: U dha jetë ëndrrave të popullit për të qenë të lirë
Presidentja e Kosovës, Vjosa Osmani, kujtoi rënien e heroit Agim Ramadani.
E para e shtetit tha se Agim Ramadani u dha jetë ëndrrave dhe aspiratave të popullit të Kosovës për të qenë të lirë.
“Agim Ramadani nuk ishte thjesht vetëm ushtarak, por një gërshetim i luftëtarit, poetit e piktorit, respektivisht një personalitet poliedrik i shndërruar në hero”, shkroi Osmani në Facebook.
“Ai është njeriu i mërgatës, patrioti e guximtari që ëndrrën për lirinë e bëri realitet duke iu bashkuar UÇK-së dhe duke u përjetësuar në heroin emblematik të shembjes së kufirit ndërmjet Kosovës e Shqipërisë”.
“Ai dhe bashkëluftëtarët u dhanë jetë ëndrrave dhe aspiratave të popullit tonë për të qenë i lirë”.
“Heroizmi dhe trashëgimia e Agimit do të vazhdojnë t`i frymëzojë brezat që do të vijnë. Qoftë i përjetshëm kujtimi për heroin Agim Ramadanin!”.