Pentiq: Bakojanisi rekomandoi që Kosova të pranohet në Këshillin e Evropës

Kryetarja e delegacionit të përhershëm të Kuvendit të Serbisë në Asamblenë Parlamentare të Këshillit të Evropës (APKE), Biljana Pantiq-Pilja, ka thënë se raportuesja për pranimin e Kosovës në Këshillin e Evropës, Dora Bakojanis, ka rekomanduar që Kosova të pranohet në këtë organizatë dhe raporti i saj do të votohet më 25 mars në mbledhjen e jashtëzakonshme të Komisionit Politik.

“Ajo ka dhënë rekomandim sepse sipas tyre dëshirën për marrëveshje e kanë shfaqur me regjistrimin e tokës së manastirit të Deçanit. Pra, pavarësisht qëndrimit të saj nga dy javë më parë ku me vendosmëri ka thënë se janë tre kushte, tani ajo tha se kjo është e mjaftueshme për të kaluar atë procedurë, dhe për pjesën tjetër, po e parafrazoj tani, 'nëse pranohet e ashtuquajtura Kosovë, duhet të jetë në ndonjë post-monitorim ku ata do të monitorojnë përparimin e tyre të mëtejshëm dhe nëse plotësojnë kushtet e tjera”, thekson Pantiq-Pilja për mediumin serb Kosovo-online, transmeton Zeri.info.

Ajo thekson se rekomandimi i Bakojanis do të votohet më 25 mars në Komisionin Politik, në një mbledhje të jashtëzakonshme të thirrur pa procedurat “sepse nguten” dhe do të shihet se çfarë disponimi kanë të tjerët. Kur Bakojanis jep mendimin e tij, votohet dhe nëse votohet, shkon për votim në Asamblenë e Përgjithshme të KE-së në prill.

Se Kosova do të jetë në rend dite në mbledhjen e 25 prillit, e ka thënë edhe Gerald Knaus nga Iniciativa Evropiane për Stabilitet, duke thënë në rrjetin social “X” se raportuesja Dora Bakojanis në raportin e saj ka rekomanduar pranimin e Kosovës në Këshillin e Evropës.

Ai ka publikuar edhe pjesë të raportit ku thotë se “Bakojanis ka rekomanduar që Kosova të njihet atje me emrin Kosovë, pa përmendur Republikën”.

“Raporti i ish-ministres së Jashtme greke Dora Bakoanis: 17. Prandaj Kuvendi i rekomandon Komitetit të Ministrave: 17.1. Ftoni Kosovën të bëhet anëtare e Këshillit të Evropës me emrin 'Kosova'; 17. Cakto 3 vende”, ka shkruar Knaus.

Ai shtoi se Kosova ka hequr edhe një pengesë për t'u anëtarësuar në klubin e demokracive që mbush 75 vjet këtë prill, “si demokracia e fundit në kontinent që nuk është anëtare e Këshillit të Evropës”. /Zëri