Projektkodi Civil, “i pakalueshëm” me përmbajtjen aktuale

Në një të ardhme jo shumë të largët, deputetët e Kuvendit të Kosovës do të përballen sërish me një temë të vjetër.

Projektkodi Civil do t’u dërgohet atyre përsëri për votim.

“Miratimi unë besoj që duhet të jetë brenda kësaj regjistrature. Mendoj që sado që mund ta shtyjmë për regjistraturën tjetër, do të ballafaqohemi me të njëjtat diskutime, me të njëjtat trajtime, vetëm varet se si do të jetë kompozicioni i deputetëve në Kuvend. Prandaj, nuk është që ne po i ikim përgjegjësisë, ose që do të duhej t’i iknim përgjegjësisë duke ia lënë dikujt tjetër”, tha Mimoza Kusari-Lila.

Megjithatë, shefja e Grupit Parlamentar të Lëvizjes Vetëvendosje, Mimoza Kusari-Lila, thekson se pozicionet e deputetëve kundërshtues nuk kanë ndryshuar.

Prandaj, ajo kërkon ndihmën e opozitës.

“Është një projektligj i rëndësisë së veçantë, i cili kalon përtej vijave ndarëse politike në raport me pushtetin dhe opozitën”, shtoi Lila.

Mungesë optimizmi në lidhje me kalimin e këtij projektkodi civil ka edhe në shoqërinë civile.

“Edhe nëse draftkodi civil në përmbajtjen aktuale shkon në Kuvend, ne nuk jemi optimistë, nuk besojmë që do të kalojë, për shkak që brenda Lëvizjes Vetëvendosje, mirëpo edhe brenda grupeve të tjera parlamentare, ka një rezistencë të madhe të mos kaluar ky kod civil”, u shpreh Marigona Shabiu.

Marigona Shabiu, nga Iniciativa e të Rinjve për të Drejtat e Njeriut, thotë se nuk janë të kënaqur as me përmbajtjen aktuale të Kodit Civil.

“Përmbajtja e draftkodit aktual nuk e rregullon çështjen e të drejtës së martesës ashtu siç përcaktohet me Kushtetutë, kështu që edhe në rast se do të kaloj në versionin aktual, ne prapë jemi të përkushtuar dhe të vendosur që ta dërgojmë të njëjtin kod civil në Gjykatën Kushtetuese”, shtoi Shabiu.

Mosmiratimi i këtij dokumenti të rëndësishëm konsiderohet se mund t’i shkaktojë probleme Kosovës në synimin për anëtarësim në Këshillin e Evropës. /Dukagjini