“Unë kam mendu që të ka mbet naj grimë UÇK”: Bekë Berisha kapet me Ejup Maqedoncin për Dejona Mihalin
Deputeti i Aleancës për Ardhmërinë e Kosovës, Bekë Berisha, ka pasur një përplasje me ministrin e Mbrojtjes, Ejup Maqedonci, gjatë raportimit të tij në Komisionin për Çështje të Sigurisë dhe Mbrojtjes.
Berisha e ka pyetur ministrin për takimin me të famshmen, Dejona Mihali.
Pasi ministri tha se nuk ka pasur asgjë të keqe në takim, ka reaguar ashpër Bekë Berisha.
“Nuk është legjitim, nuk u dalë me marrë vota, nuk është qytetare e Kosovës. Ti je ministër i Mbrojtjes në situatën më të ndishme ndonjëherë. Ka shumë rëndësi mos me u taku me të. Nuk je deputet, nuk ki nevojë me i raportu asaj. Ti raporton këtu. Unë kam mëndu që ty të ka mbet naj grimë UÇK. Maje pak. S’ki nevojë me përmend ma hiç”, tha Bekë Berisha.
Por ministri Maqedonci deklaroi se takimi me Mihalin ka qenë shoqëror dhe se mohoi të ketë marrë urdhra prej saj.
“Sa i përket takimit me Dejona Mihalin. Unë gjatë vikendeve bëjë ecje në Gërmi dhe kam pasur takim të rastësishëm me Dejonën dhe kemi pirë kafe së bashku dhe nuk mendoj se është një gjë e veçantë, nuk ka qenë drejtori i AKI-së prezent, kanë qenë një dajë i imi dhe një shok”, ka thënë Maqedonci.
