IPK: Gjatë vitit 2023 pranuam një mijë e 697 ankesa, u arrestuan 21 punonjës policorë
Inspektorati Policor i Kosovës (IPK) ka njoftuar se gjatë vitit 2023 ka pranuar një mijë e 697 ankesa, ndërsa janë arrestuar 35 të dyshuar, mes tyre 21 punonjës policorë.
Përmes një njoftimi, IPK-ja ka bërë përmbledhjen e aktiviteteve të kryera gjatë vitit 2023, ku thekson se një mijë e 145 ankesa janë klasifikuar si shkelje disiplinore.
“IPK-ja gjatë vitit 2023 ka pranuar dhe ka menaxhuar me 1697 ankesa. Prej tyre 1145 ankesa që janë klasifikuar si shkelje disiplinore dhe janë përcjellë për t’u trajtuar në Drejtorinë për hetime të brendshme dhe verifikim të së kaluarës në Policinë e Kosovës, 540 nga to janë përcjellë në Departamentin e Hetimeve në IPK me dyshimin për veprimtari penale (pjesa tjetër janë përcjellë në institucione tjera dhe në Departamentin e Inspektimeve)”, thuhet në njoftim e IPK-së.
IPK-ja po ashtu ka bërë të ditur se ka dhënë 71 rekomandime për suspendim dhe janë dorëzuar 74 kallëzime penale.
“Për periudhën raportuese, IPK-ja ka ndërmarrë këto masa dhe rekomandime: ka arrestuar 35 të dyshuar (21 punonjës policorë dhe 14 qytetar), 71 rekomandime për suspendim, në prokuroritë kompetente janë dorëzuar 74 kallëzime penale, 54 raporte të veçanta dhe 56 raporte informuese”, thuhet në njoftimin e IPK-së.
Gjatë vitit 2023, IPK-ja bën të ditur se ka realizuar 13 inspektime dhe ka dhënë 126 rekomandime për të përmirësuar performancën në fushat e inspektuara.
“Gjatë këtij viti, IPK-ja ka pasur disa aktivitete nën vazhdën e përpjekjeve për të ndërtuar marrëdhënie të qëndrueshme me qytetarë dhe partnerë të ndryshëm, me organizata qeveritare e jo qeveritare dhe me media. Gjatë vitit 2023, në kuadër të angazhimeve për fuqizimin e kapaciteteve profesionale të punonjësve të IPK-së, me përkrahjen edhe të partnerëve ndërkombëtarë si ICITAP, OSBE etj. janë organizuar dhe mbajtur 33 trajnime për punonjësit operativ dhe për stafin administrativ”, thuhet më tej.
Po ashtu, thuhet se ka pasur edhe aktivitete të realizuara me organizata vendose dhe ndërkombëtare.
“Në ceremoninë e mbajtur në muajin prill të këtij viti në Departamentin e Shtetit në Washington për ditën e Akademisë Ndërkombëtare të Zbatimit të Ligjit (ILEA), Kryeshefi Ekzekutiv i IPK-së Kushtrim Hodaj është përzgjedhur fitues i çmimit kryesor për Sukses të Jashtëzakonshëm Operacional. Inspektorati Policor i Kosovës në bashkëpunim me ICITAP-in amerikan organizoi në Prizren konferencën rajonale tre ditore me temën “Parandalimi dhe luftimi i korrupsionit në policinë kufitare”. Në kuadër të bashkëpunimit rajonal dhe ndërkombëtar, me rastin e shënimit të 17 vjetorit të IPK-së u nënshkrua deklarata për themelimin e “Forumit rajonal të agjencive mbikëqyrëse policore” në mes Republikës së Kosovës, Shqipërisë, Malit të Zi dhe Maqedonisë së Veriut. Gjatë këtij viti IPK-ja nënshkroi edhe Memorandum Mirëkuptimi me Inspektoratin e Përgjithshëm të Forcave të Sigurisë të Republikës Çeke”, thuhet në njoftimin e IPK-së. /Zëri
