Haradinaj viziton “Vatrën”: Amerika jo vetëm aleati kryesor strategjik, por edhe shtëpia e mijëra shqiptarëve

Kryetari i Aleancës për Ardhmërinë e Kosovës (AAK), Ramush Haradinaj, gjatë vizitës që është duke e bërë në Shtetet e Bashkuara të Amerikës (SHBA) ka vizituar Federatën Pan-Shqiptare të Amerikës “Vatra”, ku diskutuan për zhvillimet politike në Kosovë dhe rajon.

Ai, përmes një postimi në rrjetin social në Facebook, ka thënë se Amerika nuk është vetëm aleati kryesor strategjik, por edhe shtëpia për mijëra shqiptarë që u larguan nga vendi në kërkim të një jete më të mirë, raporton Zeri.info.

Postimi i plotë:

Amerika nuk është vetëm aleati kryesor strategjik, por edhe shtëpia për mijëra shqiptarë që u larguan nga vendi në kërkim të një jete më të mirë.

Vizitova Federatën Pan-Shqiptare të Amerikës "Vatra", ku diskutuam për zhvillimet politike në Kosovë dhe rajon, si dhe për rolin e rëndësishëm të diasporës, veçanërisht lobin shqiptaro-amerikan.

Vleresova rolin e "Vatrës" në ndihmë të shtetit të Kosovës dhe çështjes shqiptare në përgjithësi në të gjitha etapat. Në takim të përzemërt e vëllazëror fola hapur për nevojën e vazhdueshme që të gjitha organizimet shqiptare në Amerikë të vazhdojnë ta ndihmojnë Kosovën në të gjitha sferat.

Theksova se anëtarësimi i Kosovës në NATO është synimi ynë kryesor, sepse kjo e bën Kosovën dhe rajonin më të sigurt dhe e ndihmon paqen në botë, gjithnjë krah ushtrive të vendeve demokratike në krye me Amerikën.