Evakuohet edhe një familje shqiptare nga Gaza

Një familje nga Shqipëria ka arritur të largohet nga zonat e konfliktit në Gaza, ku për më shumë se një muaj kanë vazhduar luftimet e ashpëra midis militantëve të Hamasit dhe forcave ushtarake të Izraelit.

Rikthimi i familjes shqiptare në atdhe u bë publik nga ministri i Punëve të Jashtme, Igli Hasani.

Ai njoftoi në mediat sociale se disa anëtarë të familjes kishin arritur më parë në Shqipëri në fillim të muajit dhe së fundmi u bashkua me ta edhe pjesa e mbetur e familjes.

“Më në fund, Eiadi, gruaja e tij dhe katër fëmijët e tyre të mitur u larguan nga Gaza dhe do t’i bashkohen pjesës tjetër të familjes që kanë mbërritur në Shqipëri në fillim të këtij muaji. Operacioni sfidues përfundoi me sukses sot në mesditë, falë bashkëpunimit të diplomatëve tanë në Tel Aviv dhe Kajro si dhe Ministrive të Jashtme të Izraelit dhe Egjiptit”.

Hasani u ka shprehur mirënjohje të gjithë kolegëve të përfshirë në këtë proces.