Tensionet në Kuvend, Rama sulmon opozitën: Futën sjelljet e rrugës në politikë

Kryeministri i Shqipërisë Edi Rama ka reaguar përmes një postimi në rrjetin social X për tensionet e krijuara në Kuvend këtë të hënë, ku flakadanët çuan deri në një vatër të vogël zjarri që fatmirësisht u shua në kohë nga garda.

Mes zhurmës dhe tymit, ndërsa votohej buxheti i vitit 2024, Rama u shpreh se opozita ka futur fjalorin dhe sjelljet e rrugës në politikë. Sipas tij, deputetët demokratë janë kapur nga Berisha dhe derisa ai t’i “lëshojë”, ata do të vazhdojnë të “shkërmoqen”.

“I futën fjalorin e sjelljet e rrugës në politikë, ndërsa politikën e hodhën në mes të katër rrugëve, duke mbjellë sherr, rrëmujë, dhunë dhe korrur humbje, humbje, humbje… Tanimë kanë prekur fundin, ku i ka marrë me vete halli i një të kërkuari nga drejtësia, që nuk do t’i lëshojë derisa të shkërmoqen e të ridalin copa e çika mbi ujë, si mbeturinat e një anijeje të mbytur”, shkruan Rama në platformën X.

I futën fjalorin e sjelljet e rrugës në politikë, ndërsa politikën e hodhën në mes të katër rrugëve, duke mbjellë sherr, rrëmujë, dhunë dhe korrur humbje, humbje, humbje… Tanimë kanë prekur fundin, ku i ka marrë me vete halli i një të kërkuari nga drejtësia, që nuk do t’i… pic.twitter.com/pdjq7NiIVp

— Edi Rama (@ediramaal) November 20, 2023