Vuçiq: Do më kishin varur, po të sillesha si Kurti

Presidenti i Serbisë, Aleksandër Vuçiq ka dalë me deklaratën e parë për takimin e radhës që u zhvillua në Bruksel i cili përfundoi sërish pa asnjë marrëveshje.

Kreu i shtetit serb është i bindur që në fillim se kryeministri i Kosovës do të refuzonte gjithçka që kishte të bënte me asociacionin, para se të ndodhte njohja.

“U jam mirënjohës njerëzve në Bashkimin Evropian e bënë të qartë se kush është përgjegjës. Iu siguroj se nuk do të bëj asgjë që do të dëmtonte interesat e Serbisë”, tha Vuçiq.

Po ashtu, ai ka kritikuar edhe komunitetin ndërkombëtar duke pretenduar se po përdor dy standarde për dialogun Prishtinë-Beograd.

“Ata shtiren si naivë në Perëndim, që të mos shohin se çfarë ka thënë saktësisht Kurti. Po të kisha thënë atë që ai tha, do të isha varur në Berlin, Bruksel dhe Uashington, por këto janë standarde të dyfishta”, nënvizoi ai, pa saktësuar se për cilën deklaratë të kryeministrit të Kosovës po fliste.

“Edhe kur BE-ja akuzon Kurtin si fajtor, unë duhet të jem fajtor pavarësisht se nuk ekziston asnjë marrëveshje”, theksoi presidenti serb.

Vuçiqi anashkaloi pyetjen nëse në propozimin e BE-së për të ecur përpara në takimin e së enjtes ishte edhe kushti ndaj Serbisë që të mos kundërshtojë anëtarësimin e Kosovës në organizata ndërkombëtare.