Krerët e sistemit prokurorial dhe gjyqësor ofrojnë mbështetje për Prokurorinë dhe Gjykatën Themelore në Mitrovicë

Ushtruesi i detyrës së kryeprokurorit të Shtetit Besim Kelmendi, kryetari i Gjykatës Supreme Fejzullah Rexhepi, kryesuesi i Këshillit Prokurorial të Kosovës Jetish Maloku, kryesuesi i Këshillit Gjyqësor të Kosovës Albert Zogaj, me bashkëpunëtorë kanë vizituar Prokurorinë Themelore në Mitrovicë, ku janë pritur nga kryeprokurori i kësaj prokurori, Ismet Ujkani, ku ishte i pranishëm edhe zëvendëskryetari i Gjykatës Themelore në Mitrovicë, Bekim Veliqi.

Bëhet e ditur se bartësit e sistemit prokurorial dhe atij gjyqësor diskutuan lidhur me gjendjen momentale në këtë prokurori, si dhe adresimin e sfidave, vështirësive dhe çështjeve me të cilat ballafaqohen këto dy institucione në administrimin e punës pas ofrimit të dorëheqjes së prokurorëve nga radhët e komunitetit serb.

“Në këtë takim u diskutua edhe për nevojën e shtimit të numrit të prokurorëve dhe gjyqtarëve në Prokurorinë dhe Gjykatën Themelore në Mitrovicë, në mënyrë që seancat gjyqësore të mos dështojnë dhe të mos lejohet parashkrimi i rasteve”, thuhet në njoftim.

Me këtë rast krerët e sistemit prokurorial dhe atij gjyqësor zotuan se në kuadër të mundësive ligjore do të mbështesin Prokurorinë dhe Gjykatën Themelore në Mitrovicë, në mënyrë që puna në këto dy institucione të funksionojë në mënyrë sa më efikase dhe efektive, me ç’rast inkurajuan kryeprokurorin e Prokurorisë Themelore në Mitrovicë dhe zëvendëskryetarin e Gjykatës Themelore në Mitrovicë që të bëjnë përpjekje dhe të gjejnë mënyra dhe praktika në koordinim sa ma të mirë të punëve. /Zëri