Para takimit të së enjtes me Osmanin, Stoltenbergu u flet eurodeputetëve për sigurinë evropiane

Shefi i NATO-s, Jens Stoltenberg, të enjten do t’i informojë eurodeputetët mbi zhvillimet më të fundit të sigurisë evropiane dhe bashkëpunimin BE-NATO.

Sipas një njoftimi të publikuar në faqen e Parlamentit Evropian, fjalimi i sekretarit të Aleancës Veri-Atlantike në Komisionin e Punëve të Jashtme dhe Nënkomitetin për Siguri dhe Mbrojtje do të pasohet nga një shkëmbim pikëpamjesh me eurodeputetët.

Kjo paraqitje e zyrtarit të lartë të NATO-s në PE që nis pas orës 8:00 të mëngjesit i paraprin takimit po të njëjtën ditë me presidenten e Kosovës, Vjosa Osmani.

Takimi Stoltenberg - Osmani është paralajmëruar të mbahet në selinë e NATO-s në Bruksel në mesditë, njofton KlanKosova.tv.

Ende nuk janë bërë të ditura arsyet e këtij takimi, por ajo që dihet është se të dy do të mbajnë një konferencë të përbashkët për shtyp pas takimit.