Miratohet Ligji për edukim në fëmijërinë e hershme, edukimi parafillor bëhet i obliguar
Ministrja e Arsimit, Arbërie Nagavci, ka bërë të ditur se sot në Kuvendin e Kosovës është miratuar Ligji për edukimin në fëmijërinë e hershme.
Me këtë ligj edukimi parafillor bëhet i obliguar.
“Sot në Kuvendin e Kosovës u miratua Ligji për Edukimin në fëmijërinë e hershme. Po rregullojmë ofrimin e edukimit cilësor në të gjitha format e organizimit të edukimit për më të vegjlit tanë prej lindjes deri në moshën 6-vjeçare. Me ligjin e ri edukimi parafillor bëhet i obliguar”, shkroi Nagavci.
Ministrja ka shtuar se me këtë ligj po vendosim standard të ri, mundësi për të gjithë fëmijët të edukohen e të bëhen qytetarë të zot e kontribuues për veten dhe për shoqërinë.
Postimi i plotë i Nagavcit, pa ndërhyrje:
Reforma më e madhe e ndërmarrë ndonjëherë në edukimin në fëmijërinë e hershme
Sot në Kuvendin e Kosovës u miratua Ligji për Edukimin në fëmijërinë e hershme. Po rregullojmë ofrimin e edukimit cilësor në të gjitha format e organizimit të edukimit për më të vegjlit tanë prej lindjes deri në moshën 6 vjeçare.
Me ligjin e ri Edukimi Parafillor bëhet i obliguar.
Ligji i ri ndër të tjera do të ofrojë:
- Koordinim ndërsektorial
- Edukim në familje
- Ushqyeshmëri, krijim të menyve ushqimore
- Sigurim e rregullim të materialit didaktik
- Monitorim të punës edukative
- Aftësim të dadove
- Qasje holistike.
Me këtë ligj po vendosim standard të ri, mundësi për të gjithë fëmijët të edukohen e të bëhen qytetarë të zotë e kontribuues për veten dhe për shoqërinë. Edukimi i hershëm i ndihmon vogëlushët në zhvillimin socio-emocional, kognitiv dhe motorik, si dhe ndikon pozitivisht në mirëqenie të tyre. Andaj, krahas Ligjit për Edukimin në Fëmijërinë e Hershme, jemi në finalizim edhe të kurrikulës për edukim më fëmijërinë e hershme dhe do të vazhdojmë të punojmë shumë që të gjithë fëmijëve t’u ofrojmë një mjedis të sigurt dhe mbështetës.
Falënderoj përzemërsisht të gjithë deputetët për kontributin dhe votën e tyre, anëtarët e grupit punues, partnerët tanë, secilën e secilin që kanë kontribuar në finalizimin e këtij ligji të rëndësishëm e kaq cilësor.
