Situata në veri, Ngjela: Kurti do të rrëzojë Vuçiqin, bëhet përfaqësuesi i panshqiptarizmit

Avokati Spartak Ngjela ishte i ftuar këtë të hënë në Euronews Albania, ku analizoi situatën në veri të Kosovës.

Ngjela tha se përplasja për veriun e Kosovës do të sjellë rrëzimin e njërit prej liderëve të dy shteteve. Avokati nënvizoi se ose kryeministri i Kosovës Albin Kurti do të rrëzojë Presidentin serb Aleksandar Vuçiqin, ose ky i fundit do ta rrëzojë Kurtin.

Sipas Ngjelës, nëse Kurti e fiton këtë luftë, ai do të bëhet përfaqësuesi kryesor i botës shqiptare në Ballkanin Perëndimor.

“Problemi qëndron çfarë do të ndodhë me Beogradin. Pra është Kurti këtu dhe janë revoltat masive në Beograd. Ajo që do ndodh është ose Vuçiq do rrëzojë Kurtin dhe t’u thotë atyre që e rrëzova nacionalistin shqiptar. Ose Kurti do të rrëzojë Vuçiqin. Tani lind problemi a do të tërhiqet Kurti? Jo nuk tërhiqet”, tha Ngjela.

“Rezistenca e Kurtit krijon involv të ri në botën shqiptare në Ballkanin Perëndimor. Nëse Kurti e fiton atë luftë bëhet figura kryesore në politikën panshqiptare. Unë them se e fiton, është dëshira ime kjo që them dhe është analiza ime. Mendimi im në këto momente është që Kurti do ta fitojë lojën dhe Vuçiç do të rrëzohet”, shtoi Ngjela.