Serbia vazhdon ta shkelë marrëveshjen, falënderon Hungarinë për votën kundër Kosovës në KE
Serbia ka shkelur edhe një herë marrëveshjen e arritur në Bruksel me Kosovën, ku palët kishin rënë dakord të mos pengojnë njëra-tjetrën në anëtarësimin në organizata ndërkombëtare.
Së fundmi ministri i Jashtëm i Serbisë, Ivica Daçiq, gjatë vizitës së tij në Hungari ka falënderuar homologun e tij Peter Szijjarto për qëndrimin e Hungarisë ndaj kërkesës së Kosovës për anëtarësim në Këshillin e Evropës.
“Në emër dhe popullit të saj, ministri i Jashtëm Daçiq falënderoi për qëndrimin e fundit në lidhje me kërkesën e Kosovë për anëtarësim në Këshillin e Evropës”, u bë ditur në një postim në Twitter nga MPJ-ja e Serbisë.
Lidhur me këtë ka reaguar ish-ministrja e Jashtme e Kosovës, Meliza Haradinaj-Stublla.
Ajo ka thënë se Serbia po poshtëron Perëndimin duke shkelur me vetëdije dhe qëllimisht marrëveshjen.
“Menjëherë pasi ra dakord me Kosovën për Propozimin e BE-së (i mbështetur fuqishëm nga SHBA-ja), Serbia poshtëron Perëndimin duke shkelur me vetëdije, qëllimisht dhe haptazi, Nenin 4 të Marrëveshjes Themelore”, shkroi Haradinaj-Stublla.
