Këshilltari i Blinkenit telefonon Kurtin: Faleminderit, u tregove konstruktiv!
Kosova dhe Serbia të mërkurën mbrëma kanë arritur marrëveshje për targat.
Derek Chollet, këshilltari special i sekretarit amerikan të Shtetit, Antony Blinken, ka telefonuar kryeministrin e Kosovës, Albin Kurtin, pas marrëveshjes së arritur në Bruksel, për ta falënderuar për “angazhimin konstruktiv” në gjetjen e zgjidhjes për uljen e tensioneve të shkaktuara rreth targave ilegale serbe që qarkullojnë në Kosovë.
“Telefonatë e mirë me kryeministrin e Kosovës, Albin Kurti”, shkruan Cholleti në llogarinë e tij në Twitter.
“Kurtin e falënderova për angazhimin konstruktiv në gjetjen e një rruge drejt deeskalimit të tensioneve dhe përkushtimin që urgjentisht të punohet në normalizimin e raporteve në mes të Kosovës dhe Serbisë në dialogun e lehtësuar nga Bashkimi Evropian, të cilin Shtetet e Bashkuara të Amerikës e përkrahin fuqishëm”, përfundon cicërima e Cholletit.
Good call with Kosovan PM @AlbinKurti. Thanked him for constructive engagement in finding a way forward to deescalate tensions and committing to urgently work on normalization of relations between Kosovo and Serbia in the EU-facilitated dialogue, which the U.S. strongly supports.
— Derek Chollet (@CounselorDOS) November 24, 2022
Kosova dhe Serbia, përkatësisht kryenegociatorët Besnik Bislimi dhe Petar Petkoviq, kanë nënshkruar marrëveshje në Bruksel për deeskalim, ku Kosova heqë dorë nga zbatimi i masave për veturat me targa ilegale, derisa Serbia zotohet se nuk do të prodhojë më të reja.
