Mustafa: Kosova është futur në grackën e Serbisë, situata në veri më e rëndë se para një jave
Ish-kryeministri Isa Mustafa ka thënë se situata aktuale në veri të vendit është më serioze sesa ajo që ka qenë ditë më parë.
Mustafa ka deklaruar se bashkëpunimi i ngushtë, sidomos me Shtetet e Bashkuara të Amerikës, ka qenë gjithmonë një faktor kyç për Kosovën dhe stabilitetin e saj.
“Të gjitha proceset më të rëndësishme në Kosovë, që nga Rambujeja e deri më tani i kemi kapërcyer duke bashkëpunuar ngushtë sidomos me SHBA-në. Prandaj, jo vetëm këtë fazë, por edhe çdo sfidë në të ardhmen duhet ta bashkërendisim me Shtetet e Bashkuara. Nuk duhet të ndihemi keq se jemi shtet i vogël dhe t’ua kthejmë fjalën partnerëve tanë strategjikë, sepse ata e dinë së paku sa ne sesa jemi sovranë, kur akoma nuk e mbikëqyrim plotësisht një pjesë të territorit, kur për paqen kujdeset NATO-ja dhe është në fuqi Rezoluta 1244 e KS-së”, deklaroi Mustafa për Indeksonline.
Tutje, ish-lideri i LDK-së shtoi se shteti ynë është futur në grackën e Serbisë, duke vlerësuar se është e pamundur të zgjidhet situata në veri pa bashkëpunim të plotë me Bashkimin Evropian dhe SHBA-në.
“Kosova është futur në grackën e Serbisë. Situata tani është tepër më e rëndë sesa para një jave. Është vështirë, për vlerësimin tim edhe e pamundur, që të zgjidhet problemi me komunat e veriut pa bashkëpunuar ngushtë me SHBA-në dhe BE-në. Prandaj do të duhej të respektohen kërkesat për prolongim të masave për tabelat dhe të fokusohet në marrëveshjen gjithëpërfshirëse (e cila i zgjidh edhe tabelat)”, shtoi Mustafa.
Ai gjithashtu vlerësoi se realizimi i kërkesës së ndërkombëtarëve lidhur me Asociacionin, është e ndërlikuar, pasi ka ndryshuar ambienti dhe momentumi.
“Kërkesa për Asociacionin tani është më e ndërlikuar, sepse ka ndryshuar ambienti dhe momentumi. Ndryshe do të ishte që të bisedohej për këtë temë pa presion politik e ndryshe më një kushtëzim të qartë serb dhe në një presion të madh dhe shumë konkret ndërkombëtar”, përfundoi Mustafa.
