Kurti për mospraninë e Vuçiqit në Berlin: S’di pse s’erdhi, s’na mungoi fare

Kryeministri i Kosovës, Albin Kurti, teksa ka folur për mungesën e presidentit serb, Aleksandar Vuçiq, në Samitin e Berlinit, ka thënë se ai kur s’mund t’i dalë ballë detyrës, e sakrifikon dikë tjetër.

Kryeministri i Kosovës, Albin Kurti, pas Samitit në Berlin, ka folur për mospraninë e presidentit të Serbisë, Aleksandar Vuçiq.

Serbia në këtë samit është përfaqësuar nga kryeministrja serbe, Ana Bërnabiq, në mungesë të Vuçiqit.

Kurti ka thënë se ndonëse nuk e di arsyen e mospranisë së presidentit serb, megjithatë ai ka thënë se mungesa e tij nuk është vërejtur. Për Kurtin, Vuçiqi kur nuk mund t’i dalë ballë detyrës, e sakrifikon dikë tjetër.

“Nuk e di pse nuk ka ardhur dhe nuk është që na mungoi fortë, sigurisht jo mua. Bëhet fjalë për një samit në të cilin qartazi nga pothuajse secili folës dënohej agresioni rus në Ukrainë, invazioni atje dhe sidomos çështja me energjinë kur dihet se gazin e ka shndërruar në armë lufte Putini dhe ka mundësi që për një situatë të tillë është frikësuar që të jetë i pranishëm ku do të ishte i vetmuar ndaj siç ka vepruar jo rrallë herë sakrifikon dikë tjetër në vend që t’i dalë ballë detyrës”, ka thënë Kurti.

Kur pyetet nga gazetarët se kur do të ketë një takim me presidentin serb, Kurti ka thënë se varet nga ndërmjetësuesit.

“Gjithçka varet nga ndërmjetësuesit. Nga ta varet koha e takimeve sa i përket mua ata e dinë interesimin dhe gatishmërinë”, shtoi Kurti. Në anën tjetër, kur pyetet për një takim të mundshëm midis tij dhe presidentit francez, Emmanuel Macron, Kurti është shprehur i gatshëm që t’i përgjigjet secilës ftesë nga pallati Elysee.

“Kur të na vijnë ftesa sigurisht u përgjigjemi dhe e mirëpres çfarëdo iniciative për të intensifikuar bisedimet për marrëveshje finale me Kosovës dhe Serbisë, që vjen nga pallati Elysee”.

“Marrëveshja për njohjen reciproke të letërnjoftimeve, të diplomave universitare dhe të kualifikimeve profesionale”. /dukagjini