Dështon mbledhja e Komisionit për AKI-në, Musliu thotë se po mungojnë deputetët e njëjtë
Kryesuesja e Komisionit për Mbikëqyrjen e Agjencisë së Kosovës për Inteligjencë, Ganimete Musliu, ka thënë se mbledhja ka dështuar për shkak të mungesës së kuorumit.
Ajo i tha Ekonomisë Online se kjo ka ndodhur për shkak të ndërrimit të orarit të mbajtjes së mbledhjes.
“Sot është thirrur një mbledhje e rregullt e Komisioni Parlamentar për Mbikëqyrjen e Agjencisë së Kosovës për Inteligjencë, ndoshta mund ta lë si shkaktar pak ndërrimin e orarit, pasi zakonisht ne i kemi mbledhjet në orën 10:00, por meqë sot është një dëgjim publik për Ligjin për Sigurinë Kibernetike, na është dashtë që të mbajmë një orë më herët mbledhjen dhe mungoi kuorumi”, tha ajo.
Musliu tha se janë disa deputetë në këtë Komision që mungojnë rregullisht, raporton EO-ja.
“Në realitete nuk ndodh shpesh që mbledhjet e Komisionit na dështojnë për kuorum, por fatkeqësisht janë deputetët e njëjtë që mungojnë, ata deputetë që sot nuk ishin, nuk janë në çdo mbledhje”, tha ajo.
