![Jep dorëheqje zëvendësministrja e Drejtësisë, Nita Shala](/uploads/zeri.info/images/2022/November/01/auto_19080-shala-696x4641667293578.jpg)
Jep dorëheqje zëvendësministrja e Drejtësisë, Nita Shala
Nita Shala ka dhënë dorëheqje nga pozita e zëvendësministres së Drejtësisë.
Një gjë të tillë ajo e ka konfirmuar për RTK-në, duke sqaruar edhe detajet në lidhje me vendimin që ka marrë.
“Po, kam kërkuar dorëheqjen dhe nuk shërbej më në cilësinë e zëvendësministres së Drejtësisë”, tha Shala.
Duke shpjeguar arsyet, ajo tha se dorëheqje ka dhënë pas një vendimi që ka marrë Këshilli Drejtues i Universitetit të Prishtinës.
Ky Këshill ndalon emërimin, riemërimin dhe avancimin e stafit akademik që të shërbejnë në dy detyra publike njëkohësisht.
“Marrë parasysh përgatitjen time dhe përkushtimin tim për të kontribuuar në ngritjen e brezave të juristëve të rinj në Republikën tonë, vazhdimi i ushtrimit të funksionit të zëvendësministres është pengesë në përmbushjen e qëllimeve akademike”.
Megjithatë, ajo deklaroi se shërbimi në pozitën e zëvendësministres në kabinetin qeveritar të kryeministrit Kurti ka qenë nder për të dhe për këtë i është mirënjohëse.
Shala është emëruar në këtë post nga kryeministri Albin Kurti në mars të vitit 2021.