Gazetari Arben Ahmeti arrestohet për dhunë në familje
Gazetari dhe moderatori Arben Ahmeti, i cili është edhe drejtor i televizionit “Kanal 10”, është arrestuar nga Policia e Kosovës dje në orët e mbrëmjes.
Ahmeti është arrestuar pasi dje në orën 18:15 ka ushtruar dhunë, madje edhe në prezencë të fëmijëve, ndaj bashkëshortes së tij V.A.
Në raportin e policisë të siguruar nga Klan Kosova thuhet se Ahmeti, pas konfliktit verbal, në prezencë të fëmijëve, e ka shtyrë me duar gruan e tij, pasi e njëjta ka kërkuar të qëndrojë në shtëpinë e Arben Ahmetit në Lapllasellë, pasi këtë po ia kërkojnë fëmijët, mirëpo Ahmeti e ka kundërshtuar duke e shtyrë, ku më pastaj V.A. ka kërkuar ndihmën e policisë dhe për shkak të ankthit, stresit, gjendjen e viktimës, patrulla ka kërkuar ndihmë mjekësore për të.
“Më 25.09.2022, në orën 18:15, është pranuar kallëzim për dhunë në fshatin Lapllasellë, rruga ‘Dragovacka’. Në vendngjarje kanë dalë patrulla, si dhe polici hetues në detyrë për dhunë në familje, ku sipas V. A., ka pasur konflikt me bashkëshortin. Pra sot, më 25.09. 2022, rreth orës 18:00, i dyshuari Arben Ahmeti, i cili në atë kohë i kishte sjellë dy fëmijët (5 dhe 6 vjeç), të cilët qëndronin tek ai nga data 23.09.2022, për shkak se çifti nuk jeton bashkë. Në atë moment ka pasur një konflikt kur viktima/ gruaja e ka pyetur të dyshuarin të qëndrojë në shtëpi me familjen e tij për shkak se ia kanë kërkuar fëmijët, të cilët në atë moment qanin për babanë e tyre, i dyshuari ka kundërshtuar duke e ofenduar verbalisht viktimën deri në momentin kur ka pasur kontakt fizik, përkatësisht duke e shtyrë me duar nga ana e të dyshuarit. Për shkak të ankthit, stresit, gjendjen e viktimës, patrulla ka kërkuar ndihmë mjekësore për të”, thuhet në raportin e Policisë të datës 25 shtator.
Në këtë raport gjithashtu thuhet se pas grumbullimit të provave dhe intervistimit të viktimës, duke qenë se raste të ngjashme ka ndodhur edhe më parë, me urdhër të prokurores Edina Jupola, rasti është cilësuar si “Dhunë në familje” dhe gazetarit Arben Ahmeti i është caktuar masa e ndalimit prej 48 orësh në qendrën e paraburgimit në Prishtinë.
“Me urdhër të hetuesit, patrulla ka marrë deklaratën e viktimës, si dhe ka kontaktuar me të dyshuarin, ku pas provave të grumbulluara në formën e deklaratës së pjesëmarrësit dhe duke qenë se edhe më parë janë raportuar raste të ngjashme, me urdhër të prokurores së shtetit për dhunë në familje, Edina Jupolli, është urdhëruar fillimi i procedurës penale ‘Dhunë në familje’, ku të dyshuarit i është caktuar masa e ndalimit prej 48 orësh në Qendrën e Paraburgimit në Prishtinë”, thuhet në raportin e Policisë.
