Haradinaj për masakrën në Abri të Epërme: Të paharruar ata që sakrifikuan për atdheun
Kryetari i AAK-së, Ramush Haradinaj, ka kujtuar masakrën në Abri të Epërme në Drenas, në 24-vjetorin e saj.
Haradinaj në një postim në Facebook ka shkruar se barbarët ekzekutuan familjen Deliu, pa kursyer askënd, nga foshnja e deri te pleq.
I pari i AAK-së ka kujtuar edhe tre heronjtë e UÇK-së nga Abria e Epërme, që ranë po atë ditë në altarin e lirisë, Valdet Xhemajli, Vesel Demaku e Afrim Hajdaraj.
Postimi i plotë:
26 shtatori shënon ngjarje të rëndësishme për historinë tonë, sa krenare, aq edhe tragjike.
Me 1998 heroikisht do të bien në përballje me armikun, mësuesi Vesel Demaku me dy nxënësit e tij, Valdet Xhemajli dhe Afrim Hajdari.
Po atë ditë, barbarët ekzekutuan familjen Delia, po në Abri, pa kursyer askënd, nga foshnja disamuajshe e deri te plaku nëntëdhjetekatërvjeçar.
Me 1991, populli i Kosovës votoi masovikisht në referendum për t’u deklaruar për Kosovën e pavarur. Akt historik, që vulosi vullnetin tonë dhe i dha shtytje procesit për liri e pavarësi.
Të paharruar janë ata që sakrifikuan për Atdheun!