Trajkoviq: Vuçiqi u pajtua me Merkelin se prona shtetërore dhe shoqërore në Kosovë duhet të jetë e Kosovës

Kryetarja e të ashtuquajturës “Lëvizja Evropiane e Serbëve nga Kosova dhe Metohia”, Rada Trajkoviq, ka thënë për televizionin e pavarur serb N1 se presidenti serb Aleksandar Vuçiq dhe ish-kancelarja gjermane Angela Merkel më parë janë pajtuar që prona shtetërore dhe shoqërore në Kosovë të jetë pronë e Kosovës dhe se ai në thelb, sipas saj, “dorëzoi gjithçka”.

“Dhe tani ne po pyesim veten se si do të vazhdojmë, pasi në thelb ai dorëzoi gjithçka dhe po i shtyn serbët në diçka që është destabilizimi”, tha ajo.

Gazetarja e televizionit thotë se përshtypja e saj kryesore nga fjalimi i Vuçiqit të dielën është se flitet për “një lloj rezistence në veri të Kosovës”.

“Jo vetëm fjalimi i djeshëm, por ka kohë që dëgjojmë nga Vuçiqi se nuk e përjashton mundësinë e përshkallëzimit në Kosovë, mund të dëgjojmë se përshkallëzimin e interpretojmë ndryshe dhe disa herë ka folur edhe për faktin se ka disa lloje rezistencash në veri të Kosovës”, ka vlerësuar ajo.

Ndërkaq Trajkoviqi shtoi se Milan Radojiçiqi është vetëm një “maskotë” dhe se ai nuk është lider që mund t’i udhëheqë serbët në “njëfarë mbrojtjeje”.

“Sido që të jetë, kampe refugjatësh nuk do të ekzistojnë”, ka qenë mesazhi i presidentit të Serbisë pas takimit me përfaqësuesit e serbëve nga Kosova.

Ata thonë se në muajin e ardhshëm do të largohen nga të gjitha institucionet e Kosovës nëse vazhdon persekutimi i serbëve. Ato i ofrojnë mbështetje Beogradit në gjetjen e një zgjidhjeje kompromisi.

Institucionet e Kosovës insistojnë në një marrëveshje prej gjashtë pikash dhe pika e parë nënkupton njohjen reciproke dhe pranimin e Kosovës në institucionet ndërkombëtare.

Për Beogradin, kjo marrëveshje është e papranueshme.

Por, cila është zgjidhja kompromisi për serbët dhe shqiptarët në Kosovë? A po kërkon shumë Kosova? Po sikur deri më 1 shtator të mos ketë zgjidhje kompromisi për targat dhe dokumentet personale? Si i interpretojnë serbët në veri dhe ata në jug të Ibrit mesazhet e dërguara nga Beogradi?

Për atë që Vuçiqi nuk e tha ose e la pa thënë, Rada Trajkoviqi shprehet se për të “gjëja më dramatike është kur presidenti i cili ka 10 vjet që i udhëheq negociatat thotë se është vendosur në një qoshe”.

“Ai vetë i karakterizon negociatat si të pasuksesshme dhe nuk na ka treguar neve si popull dhe si shtet atë që ai personalisht e imagjinon apo e mendon se do të jenë pasojat e politikës së tij plotësisht të dështuar”, tha Trajkoviqi, transmeton Zeri.info.

Sipas saj, “dy gjëra janë të tmerrshme”.

“Njëra është që nuk po e dëgjoj që përgjigjet rektori i universitetit, që studentët vijnë të relaksuar për të dhënë provimet, shoh që është rrjedhje e heshtur e banorëve nga Kosova, frika është aty, shoh një lider të Listës Serbe (Milan Radojiçiq), i cili është më shumë maskotë sesa realisht lider që mund të udhëheqë serbët nga Kosova në diçka që është mbrojtja e serbëve me mjete të armatosura”.

Ajo pyet edhe “kush është Radojiçiqi”.

“Ai është i ri, nuk ka shërbyer në ushtri, pak njerëz dinë diçka për biografinë e tij, nuk e di nëse ai di të mbajë armën, të bëjë strategji. Prandaj ai u hodh si maskotë që duhet të organizojë serbët, por ky nuk është realiteti”, thotë ajo.

Trajkoviqi shton se nga Vuçiqi ka dëgjuar se është “gati për reciprocitet” dhe kjo është një tjetër gjë që e shqetëson.

“Ai thotë – ‘unë do t’i marr të gjitha letrat kur të kaloj vijën administrative’, ai do të marrë letrën që është në territor, dokumentet që do ta regjistrojnë si mysafir në territorin e Republikës së Kosovës. Dhe tani ai mori një grup serbësh që janë në veri për të thënë se problemi më i madh është ndryshimi i targave. Unë do t’u them se kemi pasur zgjedhje lokale, 95 për qind e serbëve kanë dalë në votime me dokumente të Kosovës dhe ajo që mendoj se është problemi më i madh është se ai ka nënshkruar dokumentin se prona e Serbisë është bartur në pronën e Kosovës. Ajo ka kaluar nëpër Kuvendin e Kosovës, aty ka qenë Lista Serbe, askush nuk ka paraqitur kërkesë në Gjykatën Kushtetuese për ta anuluar”, ka thënë Trajkoviqi.

Siç tha ajo, Vuçiqi është pajtuar me ish-kancelaren gjermane Angela Merkel që prona shtetërore dhe shoqërore të jetë pronë e Kosovës.

“Dhe tani po pyesim se si do të vazhdojmë dhe në thelb ai dorëzoi gjithçka dhe po i shtyn serbët në diçka që është destabilizimi”, thekson ajo.

Nuk ka përgjigje të qarta

Gazetarja e N1 thotë se përshtypja e saj për performancën e Vuçiqit të dielën është se nuk kanë marrë përgjigje të qarta.

“Duke qenë se thuhet se në 10 ditët e ardhshme do të kërkohet një zgjidhje kompromisi, që serbët të largohen nga institucionet e Kosovës. A do të shohim nëse kjo do të ndodhë pas shumë vitesh paralajmërime, duke qenë se ka ndodhur disa herë, si në lidhje me AKS-në, ashtu edhe me mosmbajtjen e referendumit serb në Kosovë dhe zgjedhjet serbe”, thotë gazetarja serbe.

Ajo thotë se përshtypja e saj kryesore është se po flitet për një lloj rezistence në veri të Kosovës.

“Përshtypja kryesore për mua nuk është vetëm nga fjalimi i djeshëm, por ka kohë që dëgjojmë nga Vuçiqi se nuk e përjashton mundësinë e përshkallëzimit në Kosovë, mund të dëgjojmë se përshkallëzimin e interpretojmë ndryshe, dhe ai gjithashtu foli disa herë për faktin se ka një lloj rezistence në veri të Kosovës”, thotë ajo.

Gazetarja serbe kujton se Vuçiqi, pas bisedës me Jens Stoltenbergun, shefin e NATO-s, tha se në veri të Kosovës ka të rinj që nuk do të vuajnë më dhe që nuk e pranojnë pavarësinë e Kosovës.

“Pyetja që i bëra për mbishkrimet e ‘brigadës së veriut’, të cilat u shfaqën të nesërmen e fjalimit të tij në selinë e NATO-s... Ai tha më pas se nuk do të komentonte mbi grafitet, se ka rezistencë dhe siç tha ai, kjo është ajo që e tremb atë më së shumti”, tha gazetarja e N1.

Trajkoviqi po ashtu vlerëson se më e rëndësishmja për Vuçiqin është të “marrë mbështetje” dhe se në thelb “askush nuk e di se për çfarë po merr mbështetje”.

“Negociatori nga Prishtina nuk është më i mirë dhe as më i qëndrueshëm se Vuçiqi. Kemi Kurtin që nuk ka çfarë të ofrojë në Kosovë. Liberalizimi i vizave është shumë larg, ai tani po flirton me fundamentalistët islamikë, po mundohet të miratojë ligjin për mbajtjen e shamive për vajzat e mitura... Kosova është e gjitha në trazira, Kurti është bërë i njëjti si para zgjedhjeve, të kujtojmë - për çdo ‘Vidovdan’ dhe çdo ardhje të serbëve ka pasur incidente të mëdha me serbët”, thotë Trajkoviqi.

Ajo po ashtu ka vlerësuar se “gjithçka është një sfidë e jashtëzakonshme për institucionet e Prishtinës”.

“Kjo në nivel lokal. Sa i përket nivelit global, më kujtohen fjalët e ambasadorit Hill, i cili tha – a do të ketë luftë për targat. Serbët nga veriu i Kosovës jetonin në një sistem të privilegjuar, për dallim nga serbët poshtë Ibrit... Dhe nëse kjo është gjëja më e vështirë, mendoj se po i harrojmë gjërat shumë më të rëndësishme. Në këtë moment jam e shqetësuar për studentët, çfarë po ndodh në thelb. KFOR-i nuk vjen në veri për gjëra të vogla, kjo më shqetëson”, tha Trajkoviqi.

Ai shton gjithashtu se “Beogradi është në telashe”.

Dhe me këtë pajtohet gazetarja e N1, duke thënë se mendon se targat janë vetëm rast, por jo shkaktar i problemit.

“A thotë Serbia se dëshiron të vendosë vija të kuqe në raport me lëvizjet e Kurtit... Dhe se pyetja e ditës është se cila metodë do të përdoret, dhe nëse arrihet një marrëveshje më 1 shtator, pyetja është nëse një arsye e re do të shfaqet”, tha ajo.

Sipas saj, lufta në Ukrainë ka ndryshuar dhe ka vënë në fokus çështjen e Kosovës.

“Dhe se ka një interes nga ana e komunitetit ndërkombëtar për të parandaluar një konflikt të ri në tokën evropiane. Ne mund të shohim në shumë pjesë të botës, se tani ka vërtet rëndësi se kush si do të luajë. Dikush mund të kërkojë të përfitojë nga situata në Ukrainë dhe të zgjidhë një çështje në favor të tij. Është shumë e rëndësishme se si do të luhen letrat, duke pasur parasysh se bashkësia ndërkombëtare e lidh gjithçka me Ukrainën”, përfundoi gazetarja e televizionit N1. /Zëri