Baktere me prejardhje fekale në analizat e ujit në fshatin Gorancë në Han të Elezit

Banorët e komunës së Hanit të Elezit janë akoma duke u përballur me probleme shëndetësore si pasojë e një helmimi që ka ardhur nga uji i pijshëm.

Ministria e Shëndetësisë ka njoftuar se Instituti Kombëtar i Shëndetësisë Publike të Kosovës të mërkurën, ekipi i Qendrës Rajonale të Shëndetësisë Publike në Ferizaj, ka vazhduar hulumtimin epidemiologjik në terren në komunën e Hanit të Elezit, transmeton Zeri.info.

“Nga aspekti mikrobiologjik në mostrën e ujit të marrë në fshatin Seqishtë janë prezente numri i tërësishëm i baktereve të gjalla, ndërsa në mostrën e ujit të marrë në fshatin Gorancë janë prezente numri i tërësishëm i baktereve të gjalla mbi normat e lejuara dhe Streptokoke me prejardhje fekale. Nga mostrat e fecesit të rasteve simptomatike janë izoluar E.coli Enteroaggregative (EAEC) dhe Norovirus GI/GII”, thuhet në njoftim

Njoftimi i plotë nga MSH-ja:

Komunikatë për media

Prishtinë, 14 korrik 2022

Instituti Kombëtar i Shëndetësisë Publike i Kosovës bën të ditur se më 13.07.2022 ekipi i Qendrës Rajonale të Shëndetësisë Publike - Ferizaj ka vazhduar hulumtimin epidemiologjik në terren në komunën e Hanit të Elezit.

Për analiza fiziko-komike dhe bakteriologjike janë marrë mostra në fshatin Gorancë, te rezervoari kryesor, i cili futet me rënie të lirë në rrjetin shpërndarës të fshatit dhe në disa shtëpi private që furnizohen me ujë nga ujësjellësi lokal i fshatit, të cilat janë analizuar në Qendrën Laboratorike Testuese në IKSHPK-së.

Dy mostra të ujit të marra në fshatin Seqishtë dhe Gorancë datë 11.07.2022, sipas aspektit fiziko-kimik janë në përputhshmëri me standardet e parapara me UA 16/2012.

Nga aspekti mikrobiologjik në mostrën e ujit të marrë në fshatin Seqishtë janë prezente numri i tërësishëm i baktereve të gjalla, ndërsa në mostrën e ujit të marrë në fshatin Gorancë janë prezente numri i tërësishëm i baktereve të gjalla mbi normat e lejuara dhe Streptokoke me prejardhje fekale.

Nga mostrat e fecesit të rasteve simptomatike janë izoluar E.coli Enteroaggregative (EAEC) dhe Norovirus GI/GII.

Përndryshe, brenda 24 orëve të fundit janë paraqitur 34 raste në AMF-në e fshatit Gorancë, dhe 13 raste në QKMF-ën e Hani Elezit. Të gjitha rastet ishin nga fshati Gorancë dhe kishin simptomatologji të njëjtë me: ethe, temperaturë, kokëdhembje, mundim, vjellje dhe barkqitje.

Nga banorët që kanë kërkuar ndihmë mjekësore nuk ka të hospitalizuar dhe nuk ka pasur asnjë rast të vdekjes.

IKSHPK-ja ka dhënë rekomandimet përkatëse:

1. Raportimi i menjëhershëm i rasteve të dyshimta në helmim, sipas legjislacionit në fuqi, ligji “Parandalimi dhe luftimi i sëmundjeve ngjitëse në Kosovë” (LNR: 02/L-109).

2. Të vazhdohet me informim të qytetarëve për vlimin e ujit i cili përdoret për pije dhe përgatitje të ushqimit ose te shfrytëzohen resurset tjera që kanë ujë të sigurt.

3. Te instalohet klorinatori në rezervuarin kryesor.

4. Te përcillet cilësia e ujit, të vazhdohet me mostrim për analiza laboratorike-bakteriologjike dhe vlera e Cl rezidual.

5. Marrja e të gjitha masave për njoftim dhe vetëdijesim të qytetarëve për situatën e krijuar.

6. Rekomandimi kryesor: Komuna pas përfundimit të instalimit të sistemit të klorizimit, vendosjes së orëmatëseve dhe sanimit të rezervuarit kryesor, të ia dorëzoj KRU “Bifurkacioni“-it në menaxhim.