Kurti kërkon njohje nga Greqia në takimin me shefen e Zyrës Greke në Kosovë

Kryeministri i Kosovës, Albin Kurti, ka pritur në takim njoftues shefen e Zyrës Ndërlidhëse Greke në Kosovë, Heleni Vakali.

Kurti në takim theksoi marrëdhëniet shumë të mira mes dy vendeve dhe mundësitë e thellimit të tyre nëpërmjet rritjes së shkëmbimeve tregtare dhe rritjes së bashkëpunimit ekonomik dhe investimeve.

Ai kërkoi që Greqia t’i bashkohet shumicës së vendeve të Bashkimit Evropian dhe ta njohë pavarësinë e Kosovës.

“Ambasadorja Vakali tha se është e nderuar për detyrën që ka marrë dhe se Greqia është mike e sinqertë dhe e fuqishme e Kosovës. Edhe pse ende nuk e njeh pavarësinë e Kosovës, Greqia ka arritur të zhvillojë marrëdhënie bilaterale pa kurrfarë problemi, theksoi znj. Vakali”, thuhet në njoftimin nga Zyra e Kyreministrit.

Sipas njoftimit, ajo u shpreh e impresionuar me potencialin e madh që ka Kosova dhe mundësitë që ekzistojnë për bashkëpunimin bilateral.

“Ambasadorja e vlerësoi angazhimin e Qeverisë për vlera demokratike dhe për rezultatet në luftimin e korrupsionit”, thuhet në njoftim.

Kurti dhe ambasadorja Vakali u pajtuan që duhet të vazhdojnë projektet e përbashkëta në arsim e kulturë dhe në organizimin e radhës të Forumit Ekonomik. /Zëri