Gjukanoviqi thotë se “non-paper” vjen me qëllime të rrezikshme që do luftë të menjëhershme

Presidenti i Malit të Zi, Milo Gjukanoviq, ka thënë sot se dokumenti “non-paper” është i rrezikshëm dhe se rivendosjen e kufijve në Ballkan mund ta ofrojë vetëm dikush që nuk di asgjë për këtë rajon, apo dikush që ka qëllime të rrezikshme dhe dëshiron luftë sa më shpejt që të jetë e mundur.

Sipas fjalëve të tij, “non-paper”-i nuk është kurrfarë befasie.

“Këto ide kanë jetuar në heshtje diku gjatë gjithë kësaj kohe, përmes situatave të ndryshme rastësore që vendoseshin në sytë e publikut. Edhe sot, ajo ide shfaqet, dhe të gjithë heqin dorë nga autorësia mbi të. As kjo, siç e dimë, nuk ka qenë e pazakontë gjatë gjithë historisë. Le të kujtojmë Memorandumin e vitit ’86 (Memorandumi i Akademisë Serbe të Shkencave dhe Arteve), askush nuk mori përsipër autorësinë mbi të. Le të kujtojmë ide të ndryshme të çuditshme, prapavepruese që janë nisur me synimin për të intriguar një pjesë të caktuar të publikut, për të krijuar një konfuzion politik ose shoqëror”, tha Gjukanoviqi, raporton "Klix".

Presidenti malazez mendon se edhe me dokumentin “non-paper” kemi të bëjmë sërish me rast të njëjtë.

“E kam lexuar atë dhe kushdo që është autori i tij, ai është një lexues i lig. Kjo mund të na ofrohet vetëm nga dikush që nuk di asgjë për Ballkanin, për politikën e Ballkanit ose dikush që është me qëllim të keq, dikush që dëshiron një luftë sa më shpejt të jetë e mundur. Të gjitha shpjegimet e tjera janë joreale dhe jo bindëse. T’i propozosh Ballkanit përtej asaj formulës që na sugjeroi Komisioni i Badinterit nga viti ’91-‘92 dhe atë rastin specifik të vitit ’99 e cila ndodhi pas një katastrofe humanitare që u përgatit për Kosovën... për çdo korrigjim tjetër të kufijve mendoj se është e detyrueshme të hysh në luftë”, u tha Gjukanoviqi gazetarëve.

Ai shfaqi shpresën se ka mjaft njerëz politikisht seriozë në rajon dhe në bashkësinë ndërkombëtare, ka mjaft adresa me autoritet politik, të cilët nuk do të lejojnë “të bien në skenarin që ne tashmë e kemi mbijetuar dhe që i ka kushtuar shumë këtij rajoni”. /Zëri