“Autostrada Biennale” dhe “Manifesta 14” e shpallin partneritetin e tyre në Prishtinë

Në frymën e bashkëpunimit, miqësisë dhe solidaritetit, “Autostrada Biennale” dhe “Manifesta 14 Prishtina”, dy bienale arti të cilat momentalisht po operojnë në Kosovë, kanë shpallur bashkëpunimin dhe partneritetin mes vete që do të rezultojë me prezantimin e dy punëve artistike ku do të angazhohet edhe publiku, në Prishtinë, në korrik të këtij viti.

Përmes një komunikate për media nga “Autostrada Biennale”, thuhet se dyshja e bienaleve aktualisht po përgatiten secila për edicionet e tyre të radhës për verën e këtij viti dhe vjeshtën e vitit 2022, përkundër rrethanave të vështira.

“Ne besojmë se veçanërisht gjatë këtij realiteti të shtrënguar, të dyja bienalet e vendosura në Kosovë duhet të qëndrojnë të bashkuara dhe në solidaritet me njëra tjetrën. Duke e pasur këtë në mendje, jemi të lumtur e të kënaqur që po e lansojmë partneritetin tonë”, kanë thënë nga “Autostrada Biennale”.

Edicioni i tretë i “Autostrada Biennale” do të hapet në Prishtinë, me 1 korrik 2021, me dy punë të mëdha të komisionuara artistike që do të zënë vend në hapësira publike, në bashkëpunim dhe mbështetur nga “Manifesta 14” dhe organizata të tjera lokale, për të vazhduar më pas në Prizren me 17 korrik dhe në Pejë me 21 korrik. Kuratoret e këtij edicioni janë Ovul O. Durmushoglu dhe Joanna Warsza.

“‘Autostrada Biennale’ i ka fillet e saj në Prizren, në Kosovë, në vitin 2017, bazuar në nevojën për më shumë shkëmbime kulturore me anë të artit bashkëkohor në Ballkanin Perëndimor. Pandemia na detyroi që ta rimendonim modelin e sivjetmë të Bienales dhe rolin e saj në ndërtimin e infrastrukturës, prandaj jemi shumë të entuziazmuar të bashkojmë forcat me ‘Manifesta 14 Prishtina’. Në këtë mënyrë, ne do të vazhdojmë punën në objektivat tona: shumë lokal dhe shumë të ndërlidhur”, kanë thënë Vatra Abrashi, Leutrim Fishekqiu, Barish Karamuço, bashkëthemeluesit e “Autostrada Biennale”.

Ndërkaq, Drejtoreshë Themeluese në “Manifesta”, Hedwig Fijen, tha se me mbështetjen e projekteve lokale në Kosovë, duke nisur me mbështetjen e “Autostrada Biennale” në kapitullin e saj në Prishtinë, “po e stimulon një ekonomi kulturore të bujarisë dhe harmonisë, përtej zhvillimit të një edicioni tjetër të ‘Manifestas’ përmes ekspozitave të kuruara monolite”.

“Në këtë moment shumë të veçantë në kohë, kur bota është ende e bllokuar dhe gjithçka mbetet në një ngërç shkaku i pandemisë globale, ekziston një kërkesë për metodologji të reja, për mënyra të reja të bashkëpunimit dhe fokus intensiv në krijimin e projekteve lokale të qëndrueshme. Manifesta e ndjen se me mbështetjen e projekteve lokale në Kosovë, duke nisur me mbështetjen e Autostrada Biennale në kapitullin e saj në Prishtinë, po e stimulon një ekonomi kulturore të bujarisë dhe harmonisë, përtej zhvillimit të një edicioni tjetër të Manifestas përmes ekspozitave të kuruara monolite. Aktet e solidaritetit me institucionet ekzistuese në Kosovë dhe krijimi i një ndikimi të qëndrueshëm për komunitetet lokale do të jenë dy rrugë përmes së cilave do të rigjenerohen bienalet gjithandej nëpër botë, në një periudhë pas Covid”, u shpreh Fijen.

Durmushoglu dhe Joanna Warsza, kuratore të edicionit të tretë të “Autostrada Biennale”, thanë se “puna në bienale përgjatë pandemisë na ka bërë të kuptojmë se arti sot është mbi të gjitha një formë e rimëkëmbjes, një mënyrë për të kapërcyer izolimin. Ne e shohim bashkëpunimin tonë si një akt rezistence”.

“Autostrada Biennale” dhe “Manifesta 14 Prishtina” do të bashkëpunojnë gjatë kurimit dhe implementimit të programeve publike të cilat lidhen me këto dy punë artistike dhe ekspozitat respektive, për të cilat do të njoftoheni me kohë. Të dyja organizatat artistike kanë përzgjedhur një bashkim shembullor të forcave, duke ftuar kësisoj edhe banorët e Prishtinës që të marrin pjesë në këto prodhime. /Zëri