Rithemelohet Lotaria e Kosovës, bastoret dhe kazinotë nuk rihapen

Në mbledhjen e sotme të Qeverisë së Kosovës ministrat kanë votuar për rithemelimin e Lotarisë së Kosovës.

Kjo u bë me propozimin e Ministres së Financave, Hykmete Bajrami.

“Rithemelimi i Lotarisë së Kosovës, pas ndalimit të funksionimit të saj, legjislatura e kaluar ka kërkuar që kjo çështje të ketë trajtim të veçantë ligjor. Sot prezantojmë projektligjin për rithemelimin e Lotarisë së Kosovës, që parashihet të jetë suksesor juridik i ish-subjektit Lotaria e Kosovës. Mund të organizojë vetëm lojëra numerike, jo edhe llojet e tjera të lojërave”, ka thënë ajo, raporton “Expressi”.

Bajrami shton se janë 62 punëtorë që kthehen në punë.

Ajo sqaron se kjo nuk do të thotë se do të hapen edhe bastoret e kazinotë.

“Qeveria është aksionar dhe organ mbikëqyrës është Bordi. Ai emërohet sipas kritereve të qarta që garantojnë cilësi dhe procedura transparente. Ky ligj nuk i rihap lojërat e fatit, po e rithemelon Lotarinë, lojërat numerike dhe ‘instant’. Nuk po bëjmë hapje të kazinove ose bastoreve, janë 62 punëtorë që kanë mbetur pa punë, këta punësohen në mënyrë automatike”, u shpreh Bajrami. /Zëri