Infektuar: 38431
Shëruar: 23754
Vdekur: 989
Ndahen 60 milionë euro për subvencionimin e pagave të bizneseve aktive

Ndahen 60 milionë euro për subvencionimin e pagave të bizneseve aktive

Aktuale September 28, 2020 - 09:38

Qeveria ka ndarë 60 milionë euro për subvencionimin e pagave për bizneset aktive.

Ministrja e Financave, Hykmete Bajrami, në prezantimin e këtij propozimi tha se subvencionimi përfshin edhe bizneset e reja të regjistruara nga fillimi i vitit deri në muajin gusht 2020.

“Sipas Programit për Rimëkëmbjen Ekonomike dhe sipas vendimit të Qeverisë së datës 13 gusht, në Ministrinë e Ekonomisë dhe të Ambientit ndahen 60 milionë euro, ndarja behët për subvencionimin e pagave për bizneseve aktive duke u bazuar me numrin e të punësuarve, të deklaruar në deklaratën e tatimit të muajit dhjetor 2019, që plotëson kushtet në vijim: të kenë statusin e tatimpaguesit aktiv për muajin korrik dhe të kenë të dorëzuar deklaratën tremujore”.

Sipas saj, nga ky vendim nuk do të përfitojnë ndërmarrjet publike dhe bizneset që e kanë të rregulluar tregun nga rregullatorët.

“Subvencionimi përfshin edhe për bizneset e regjistruara për periudhën janar-gusht 2020, ku në këtë rast subvencionimi bazohet në numrin e të punësuarve për muajin korrik 2020. Nga ky vendim nuk do të përfitojnë ndërmarrjet publike dhe bizneset që e kanë të rregulluar tregun nga rregullatorët”.

Bajrami në këtë mbledhje tha se janë ndarë edhe 7.5 milionë euro për subvencionimin e skemës pensionale, raporton EO-ja.

“Ndahen 7.5 milionë euro për subvencionimin e skemës sociale për periudhën tetor-dhjetor 2020. Kjo pagesë kryhet në baza mujore me pagesën e rregullt të skemës sociale. Po ashtu ndahen 12 milionë euro për subvencione dhe 1 milion euro për përkrahjen e ndërmarrjeve publike”, përfundoi Bajrami.

Po ashtu në këtë mbledhje është miratuar vendimi për dyfishimin e subvencioneve për bujqit.