Kajtazi: Gjithçka përfundoi për Vjosa Osmanin në LDK në momentin kur nuk e votoi kryeministrin Isa Mustafa
Pas deklaratave të kryetares së Kuvendit, Vjosa Osmani, se që nga përjashtimi i saj nga LDK-ja ka përfunduar gjithçka me këtë parti ka ardhur reagimi nga partia e Isa Mustafës.
Deputetja Lirije Kajtazi tha se në momentin kur Vjosa Osmani nuk e ka votuar Isa Mustafën për kryeministër, aty ka përfunduar gjithçka që ajo të vazhdojë të mbetet në Lidhjen Demokratike të Kosovës.
“Faktikisht prej kohës kur ajo nuk e ka votuar kryeministrin e vet Isa Mustafën, aty ka përfunduar gjithçka”, deklaroi ajo.
Kajtazi për gazetën “Blic” tha se vazhdimi i Osmanit në LDK varet nga disponimi i saj.
“Gjithçka varet nga disponimi i saj, nëse i mungon disponimi për të vazhduar me LDK-në, më mirë është të largohet”, tha Kajtazi.
Deputetja Kajtazi i doli në mbrojtje kryeministrit nga radhët e LDK-së, Avdullah Hoti, të cilin e kishte quajtur Vjosa Osmani “arrogant” e Kajtazi tha se kjo nuk i përshtatet atij aspak.
“E për deklaratën që e ka dhënë për zotërinë Hoti, për arrogancë, kjo është diçka që aspak nuk i përshtatet atij” përfundoi Katjazi për gazetën “Blic”.
E një nga themeluesit e LDK-së, Bujar Bukoshi, nuk deshi të komentojë deklaratën e Vjosa Osmanit.
“Nuk dua të komentoj, nuk kam analizë për këtë çështje”, tha Bukoshi.
